ডিফুৰ পৰা কৰ্মসূত্ৰে বদলি হোৱা বিদায়ী উপায়ুক্ত দিবাকৰ নাথে আজি যোৱা হাইস্কুল আৰু উচ্চতৰ মাধ্যমিকৰ শিক্ষান্ত পৰীক্ষাত উত্তীৰ্ণ হোৱা মেধাৱী ছাত্ৰ-ছাত্ৰীৰ মাজত ‘ইণ্ডিয়ান পলিটি’ নামৰ কিতাপখন উপহাৰ হিছাপে আগবঢ়ায় ৷
এই উপলক্ষে আজি ডিফুস্থিত আৱৰ্ত ভৱনত আয়োজিত এক বিশেষ মত-বিনিময় অনুষ্ঠানত জিলা উপায়ুক্ত দিবাকৰ নাথে কৃতী ছাত্ৰ-ছাত্ৰী সকলৰ সৈতে মত বিনিময় কৰে পৰামৰ্শমূলক গাইডলাইনৰ বিষয়ে আলোচনা কৰে ৷
সাংবাদিকৰ সৈতে হোৱা বাৰ্তালাপত উপায়ুক্ত দিবাকৰ নাথে কয়যে, বিগত সময়ত জিলাখনত উচ্চ আৰু উচ্চতৰ মাধ্যমিক বিদ্যালয়ৰ ছাত্ৰ-ছাত্ৰীৰ মাজত আনন্দৰাম বৰুৱা বঁটা প্ৰদানৰ সময়ত সেই সকল ছাত্ৰ-ছাত্ৰীক ৰাষ্ট্ৰীয় লোক সেৱা আয়োগৰ পাঠ্যক্ৰমত সহায়ক হোৱাকৈ গাইডলাইন আৰু বুনিয়াদী জ্ঞানৰ ব্যৱস্থা কৰা হব বুলি উপায়ুক্ গৰাকীয়ে প্ৰতিশ্ৰুতি দিছিল৷
সেই প্ৰতিশ্ৰুতি ৰক্ষা কৰিয়েই আজি সেই সকল ছাত্ৰ-ছাত্ৰীক লোকসেৱা পাঠ্যক্ৰমত সহায়ক হোৱাকৈ ‘ইণ্ডিয়ান পলিটি’ নামৰ কিতাপখন উপহাৰ হিছাপে প্ৰদান কৰা হ’ল বুলি মন্তব্য কৰে বিদায়ী উপায়ুক্ত গৰাকীয়ে ৷ আনহাতে উক্ত কাৰ্যত উপায়ুক্ত গৰাকীৰ সৈতে সহকাৰী উপায়ুক্ত গুঞ্জন শৰ্মাই গুৰুত্বপূৰ্ণ ভূমিকা গ্ৰহণ কৰে বুলি উপায়ুক্ত গৰাকীয়ে জানিবলৈ দিছে ৷
