পুত্ৰই ঘৰতে লুকুৱাই ৰাখিলে মাতৃৰ মৃতদেহ। শেষত মৃতদেহটোৰ পৰা নিৰ্গত হোৱা পচি যোৱা গোন্ধ ঘৰৰ বাহিৰত বিয়পিবলৈ ধৰিলে। ফলত ওচৰ-চুবুৰীয়াৰ সন্দেহ হয়। আৰক্ষীক খবৰ দিয়াত আৰক্ষী আহি মৃতদেহ আৰু মৃতকৰ ৪৫ বছৰীয়া মদ্যপায়ী পুত্ৰক উদ্ধাৰ কৰে।
উত্তৰ প্ৰদেশৰ গুলৰিহাত সংঘটিত হৈছে এই ঘটনা। আৰক্ষীয়ে জনোৱা মতে, মৃতকৰ বয়স ৮২ বছৰ। তেওঁৰ নাম শান্তি দেৱী। চৰকাৰী বিদ্যালয়ৰ অৱসৰপ্ৰাপ্ত শিক্ষয়িত্ৰী। তেওঁৰ একমাত্ৰ সন্তান পুত্ৰ নিখিল মিশ্ৰ।
নিখিলে পত্নী, সন্তানৰ আৰু মাকৰ সৈতে একেখন ঘৰতে থাকে। কিন্তু ১৫ দিন পূৰ্বে পাৰিবাৰিক অশান্তিৰ বাবে নিখিলৰ পত্নীয়ে শিশুটিৰ সৈতে পিতৃৰ ঘৰলৈ যায়। তাৰ পিছত শান্তি দেৱীৰ মৃত্যু হয়। নিখিলে আৰক্ষীক জনোৱা মতে, ৫ দিন পূৰ্বে মাতৃ অসুস্থ হৈ মৃত্যুমুখত পৰে। কিন্তু অন্ত্যেষ্টিক্ৰিয়াৰ বাবে প্ৰয়োজনীয় ধন নথকাৰ বাবে তেওঁ মাকৰ মৃতদেহৰ শেষ ৰীতি-নীতি কৰিব নোৱাৰিলে।
যদিও আৰক্ষীয়ে নিখিলৰ লগত কথা পাতিছিল, তথাপিও তেওঁৰ ভাষ্যৰ গোলমাল ধৰা পৰিছিল। ইয়াৰ উপৰি তেওঁ এজন মদ্যপায়ীও আছিল। গতিকে কʼবলৈ গʼলে এতিয়াও ঘটনাটোৰ বিষয়ে স্পষ্ট হোৱা নাই। মৃতদেহটো মৰণোত্তৰ পৰীক্ষাৰ বাবে প্ৰেৰণ কৰিছে আৰক্ষীয়ে। তদন্ত শেষ হোৱাৰ পিছতহে অধিক ব্যৱস্থা গ্ৰহণ কৰা হʼব বুলিও জানিবলৈ দিয়ে।
কিন্তু প্ৰাথমিক তদন্তত আৰক্ষীয়ে জানিব পাৰিছে যে নিখিলে আগতে মদ্যপান কৰি ঘৰত অশান্তিৰ সৃষ্টি কৰিছিল। তেওঁৰ আচৰণত বিৰক্ত হৈ পত্নী আৰু সন্তানে ঘৰ এৰি গুচি যায়। আনহাতে, ওচৰ-চুবুৰীয়াই জনোৱা মতে, ঘৰটোত কেইবাজনো ভাড়াতীয়াই বসবাস কৰিছিল। কেইমাহমান আগতে তেওঁলোকো নিখিলৰ বাবে ঘৰ এৰি গৈছিল।
