নতুন দিল্লী (New Delhi)ৰ শ্ৰীমন্ত শংকৰদেৱ ভৱনত (Srimanta Sankardeva Bhavan) কালি বিয়লি অনুষ্ঠিত অসম সাহিত্য সভাৰ (Assam Sahitya Sabha) দিল্লী শাখাৰ (Delhi Branch) এক গাম্ভীর্যপূর্ণ অনুষ্ঠানত বিশিষ্ট লেখক- কবি ডা: হেমন্ত কুমাৰ গোস্বামী (Dr. Hemant Kumar Goswami)ৰ শেহতীয়া কাব্যপুথি “এখন প্ৰেমময় পৃথিৱীৰ বাবে” উন্মোচন কৰা হয়।
কটন বিশ্ববিদ্যালয়ৰ প্ৰাক্তন অধ্যাপিকা ড: মঞ্জু দেৱী পেগুৰ বিশ্লেষন সম্বলিত কাব্য পুথিখন উন্মোচন কৰে ক্ৰমে দিল্লী বিশ্ববিদ্যালয়ৰ প্ৰাক্তন অধ্যাপিকা তথা চলিত বৰ্ষৰ সাহিত্যিক পেঞ্চন প্ৰাপ্ত বিশিষ্ট সাহিত্যিক ড: মলয়া খাউণ্ড, জৱাহৰলাল নেহেৰু বিশ্ববিদ্যালয়ৰ অধ্যাপক ড: বিনোদ খেদেৰিয়া, দিল্লী নিবাসী বিশিষ্ট সংস্কৃত পণ্ডিত কৰ্ণেল জিতেন হাজৰিকা, দিল্লীৰ বিশিষ্ট সমাজসেৱীকা ড: ৰীণা শৰ্মা আৰু দিল্লী দূৰদৰ্শনৰ প্ৰসিদ্ধ অভিযন্তা ত্ৰিদিৱ শইকীয়াই।
শতাধিক বিশিষ্ট ব্যক্তি উপস্থিত থকা অনুষ্ঠানত নগাঁৱৰ উৰিয়াগাঁও নিৱাসী কবি ডাঃ হেমন্ত কুমাৰ গোস্বামী পৰিয়ালসহ উপস্থিত থকাৰ লগতে ডা: গোস্বামীৰ সহধৰ্মিণী পল্লৱী গোস্বামীয়ে কাব্যপুথিখনৰ এটি কবিতা পাঠ কৰে ।
আনহাতে কবি ডা: গোস্বামীয়ে তেওঁৰ কাব্যগ্ৰন্হখন উন্মোচনৰ সুবিধা কৰি দিয়াৰ বাবে অসম সাহিত্য সভাৰ লগতে দিল্লী শাখা সাহিত্য সভা আৰু উন্মোচক সকলক কৃতজ্ঞতা জ্ঞাপন কৰে। উল্লেখ্য যে ”এখন প্ৰেমময় পৃথিৱীৰ বাবে” কাব্য পুথিখন প্ৰকাশ কৰি উলিয়াইছে নগাঁৱৰ মন্টু বুক ষ্টলে ।
