অসমৰ আন্তঃগাঁথনি উন্নয়নৰ (Infrastructure development in Assam) লক্ষ্যৰে যোৱা ৫ ডিচেম্বৰত মুখ্যমন্ত্ৰী ড॰ হিমন্ত বিশ্ব শৰ্মাই (Dr. Himanta Biswa Sarma) এক বিশেষ পদক্ষেপৰ শুভ উদ্বোধন কৰে৷ ৰাজ্যৰ ১১ খন জিলাত ১৫ হাজাৰ কোটি টকা ব্যয়সাপেক্ষে বিভিন্ন উন্নয়নমূলক আঁচনি আৰু প্ৰকল্পৰ শিলান্যাসেৰে (foundation of the scheme and the project) এই পদক্ষেপৰ প্ৰথমটো পৰ্যায়ৰ সামৰণি পৰে ২৪ ডিচেম্বৰত৷
মুখ্যমন্ত্ৰী ড॰ শৰ্মাৰ নেতৃত্বত যোৱা ৩০ নৱেম্বৰত শিলচৰত অনুষ্ঠিত ৰাজ্যিক কেবিনেট বৈঠকত ‘বিকাশৰ বাবে এটা পষেক’ কাৰ্যসূচী ৰূপায়ণৰ সিদ্ধান্ত গ্ৰহণ কৰা হয়৷
মুখ্যমন্ত্ৰীয়ে ৫ ডিচেম্বৰত বঙাইগাঁও জিলাত (Bongaigaon District) ‘বিকাশৰ বাবে এটা পষেক’ শীৰ্ষক কাৰ্যসূচীৰ শুভাৰম্ভণি কৰে৷ অনুষ্ঠানত তেওঁ এখন আদৰ্শ চিকিৎসালয় উদ্বোধন কৰাৰ লগতে ৬৯৩.২৯ কোটি টকা ব্যয়সাপেক্ষে এখন নতুন চিকিৎসা মহাবিদ্যালয়, সংহত উপায়ুক্তৰ কাৰ্যালয় আৰু কনভেনচন চেণ্টাৰৰ আধাৰশিলা স্থাপন কৰে৷ ইয়াৰ লগতে বঙাইগাঁও পলিটেকনিক মহাবিদ্যালয়ৰ আন্তঃগাঁথনি উন্নীতকৰণৰো পৰিকল্পনা হাতত লোৱা হৈছে৷ প্ৰথম পৰ্যায়ত অন্তৰ্ভুক্ত জিলাসমূহত প্ৰায় একেধৰণৰ বহুকেইটা পদক্ষেপ গ্ৰহণ কৰা হৈছে৷
কাৰ্যসূচীৰ দ্বিতীয়দিনা নলবাৰী জিলাত ৬৭৮.৪৩ কোটি টকা ব্যয়সাপেক্ষে কেইবাটাও পথ মেৰামতি আৰু নিৰ্মাণৰ লগতে সৌন্দৰ্যবৰ্ধন আৰু ক্ৰীড়া প্ৰকল্পৰ শিলান্যাস কৰা হয়৷ অসম কৃষি বিশ্ববিদ্যালয়ৰ অধীনস্থ নলবাৰী উদ্যান বিজ্ঞান আৰু কৃষি পদ্ধতি গৱেষণা মহাবিদ্যালয় আৰু এটা তাৰকাগৃহৰ শুভ উদ্বোধনো অনুষ্ঠানটিৰ উল্লেখ্য দিশ আছিল৷ ‘বিকাশৰ বাবে এটা পষেক’ কাৰ্যসূচীৰ প্ৰথম পৰ্যায়ত তামুলপুৰ, মৰিগাঁও, গোলাঘাট, বিশ্বনাথ, মাজুলী, যোৰহাট, লখিমপুৰ, ধেমাজি আৰু ডিব্ৰুগড়কে ধৰি ১১খন জিলাক সামৰি লোৱা হৈছে৷
প্ৰথম পৰ্যায়ত ৰাজ্য চৰকাৰে সৰ্বাধিক বিনিয়োগ কৰা জিলা হিচাপে পৰিগণিত হোৱা গোলাঘাটত ১৪টা উন্নয়নমূলক প্ৰকল্পত ১৫০০ কোটি টকা বিনিয়োগ কৰিব৷ ‘বিকাশৰ বাবে এটা পষেক ’ অনুষ্ঠানত মুখ্যমন্ত্ৰী ড॰ হিমন্ত বিশ্ব শৰ্মাই লাচিত মৈদাম স্মাৰক আৰু সাংস্কৃতিক প্ৰকল্পৰ কাম দুবছৰত সম্পূৰ্ণ কৰাৰ আশ্বাস প্ৰদান কৰে৷ তেওঁ কয় যে নিৰ্মাণকাৰ্য সম্পূৰ্ণ হোৱাৰ পাছত এই স্থান ৰাজ্যৰ অন্যতম পৰ্যটনস্থলীলৈ ৰূপান্তৰিত হ’ব৷
২৪ ডিচেম্বৰত ডিব্ৰুগড় জিলাৰ টিংখাঙত ‘বিকাশৰ বাবে এটা পষেক’ কাৰ্যসূচীৰ সামৰণি পৰে৷ অনুষ্ঠানত ৯৭৩.৩৮ কোটি টকা ব্যয়সাপেক্ষে জিলাখনত কেইবাটাও উন্নয়নমূলক প্ৰকল্পৰ ঘোষণা কৰা হয়৷
