তুৰস্ক (Turkey) আৰু ছিৰিয়াত (Syria) ভূমিকম্পত(Earthquake) মৃত্যু হোৱা লোকৰ সংখ্যা ১৫ হাজাৰ অতিক্ৰম কৰে। আহতসকলৰ সংখ্যা ৩৫ হাজাৰৰো অধিক। ভূমিকম্পৰ পিছত ভয়াৱহ শীতৰ বাবে দুয়োখন দেশৰ উদ্ধাৰ প্ৰচেষ্টাত বাধাৰ সৃষ্টি হয়। উদ্ধাৰ অভিযানত ত্ৰুটি স্বীকাৰ কৰে তুৰ্কীৰ ৰাষ্ট্ৰপতি ৰেচেপ টাইব এৰদোগানে (Recep Tayyip Erdoğan) ।দুৰ্যোগ ব্যৱস্থাপনা নীতিৰ বাবে আন্তঃৰাষ্ট্ৰীয় পৰ্যায়ত তুৰ্কী চৰকাৰক সমালোচনা কৰা হৈছিল।
উদ্ধাৰ অভিযানত দেখা দিয়া সমস্যাৰ কথা স্বীকাৰ কৰে ৰাষ্ট্ৰপতিগৰাকীয়ে। তেওঁ ভূমিকম্পৰ ফলত দেশৰ আটাইতকৈ বেছি ক্ষতিগ্ৰস্ত অঞ্চল পৰিদৰ্শন কৰে। তেওঁ কয়, “ত্ৰুটি হৈছে এয়া নিশ্চিত। পৰিস্থিতি স্পষ্ট দেখা যায়। ইমান ডাঙৰ দুৰ্যোগৰ বাবে আমাৰ কোনোৱেই সাজু নাছিল। ইয়াৰ বাবে আগতীয়াকৈ প্ৰস্তুত হোৱাটোও সম্ভৱ নহয়।”
সোমবাৰে পুৱা তুৰস্কত ভূমিকম্পৰ সৃষ্টি হয়। মূল কম্পনৰ প্ৰাবল্য আছিল ৰিখটাৰ স্কেলত ৭.৮। ইয়াৰ পিছত অন্তত ১০০বাৰ কপিছে তুৰস্ক আৰু ছিৰিয়াৰ ভূমি। ইতিমধ্যে এই ভূমিকম্পক শতিকাৰ অন্যতম ভয়ংকৰ আৰু মাৰাত্মক ভূমিকম্প হিচাপে স্বীকৃতি দিয়া হৈছে।
ভূমিকম্পৰ ধ্বংসাৱশেষৰ তলত আবদ্ধ বহু লোকৰ মৃত্যু হয়। দুৰ্যোগৰ পিছত অত্যন্ত ঠাণ্ডা আৰু ভোকৰ বাবেও আন বহু লোকৰ মৃত্যু হয়। বৃহস্পতিবাৰলৈকে মৃত্যুৰ সংখ্যা ১৫ হাজাৰ অতিক্ৰম কৰিছে।
প্ৰশাসনে আশংকা কৰিছে যে মৃত্যুৰ সংখ্যা বৃদ্ধি পাব পাৰে। বহুতে হয়তো এতিয়াও ধ্বংসাৱশেষৰ তলত আবদ্ধ হৈ আছে। ভূমিকম্পত বিধ্বস্ত তুৰস্ক আৰু ছিৰিয়াত এতিয়া কেৱল মৃত্যুৰ শোভাযাত্ৰা। কোনোবাই অনাহাৰে, কোনোবাই অসহায় হৈ চাই আছে নিজৰ আপোনজনৰ ধ্বংসৰ তলত মৃত্যু হোৱা।
তুৰ্কী প্ৰশাসনৰ সূত্ৰ অনুসৰি, প্ৰচণ্ড ঠাণ্ডা আৰু বৰষুণৰ ফলত উদ্ধাৰ কামত বাধাৰ সৃষ্টি হৈছে। ধ্বংসপ্ৰাপ্ত পথৰ বাবে বহু অঞ্চললৈ যাব পৰা নাই উদ্ধাৰকাৰী। সকাহ নাই। ফলত অঞ্চলটোত ক্ষোভ বাঢ়িছে।
