ASSAM TIMES POST
ডিফুঃ পুনৰ কাৰবি আংলঙ জিলাত পোহৰলৈ আহিছে অবাধ হাৰত বন ধ্বংস কাৰ্য ৷আজি বোকাজানৰ ডাৰোগা বাগানত বাগানৰ একাংশ যুৱকে দুখন টাটা ডি.আই গাড়ী সন্দেহৱশত ৰখাই সোধাপোছা কৰোতেই গাড়ী দুখনত মূল্যবান চেগুন কাঠৰ কুণ্ডা থকাৰ কথা পোহৰলৈ আহে ৷
যুৱক সকলে সংবাদ মাধ্যমৰ আগত প্ৰকাশ কৰে যে আজি কিছুদিনৰ পৰা ৰাতিৰ আন্ধাৰৰ সুযোগ লৈ বাগানৰ পথেৰে শাক-পাচলি সৰু সৰু গাড়ীত লৈ যায় বুলিয়েই তেওঁলোকে জানিছিল। কিন্তু পৰৱৰ্তী পৰ্যায়ত বাগানৰ মাজেৰে বাইক,সৰু-ডাঙৰ ট্ৰাকৰ সঘন অহা-যোৱা তেওঁলোকৰ দৃষ্টিগোচৰ হোৱাত নিৰাপত্তাৰ স্বাৰ্থত ৰাতি পহৰা দিয়াৰ সময়তে আজি পুৱা ড্ৰাইভাৰ সহ এএছ-০৯-চি-৮৮৯৩ আৰু এএছ-০৯-এচি-২২৭০ নম্বৰৰ টাটা ডি.আই. গাড়ী দুখন তেওঁলোকে জব্দ কৰি আৰক্ষী আৰু বন বিভাগক খবৰ দিয়ে ৷
আৰক্ষীৰ লোক উপস্থিত হৈ গাড়ী দুখন চমজি লয় যদিও বন বিভাগৰ লোক বহু পলমকৈহে উপস্থিত হয় ৷ ইপিনে যুৱক সকলে জনোৱা মতে জনৈক জালাল ,কাৰ্তিক , চাইফুল আৰু বিশ্বাস নামৰ লোক কেইজনৰ নেতৃত্বত গাড়ী দুখন নগালেণ্ডলৈ গৈ আছিল ৷
আৰক্ষীয়ে ড্ৰাইভাৰসহ গাড়ী দুখন বোকাজান আৰক্ষী থানালৈ লৈ অনাৰ লগতে অধিক তথ্যৰ বাবে সোধপোচ অব্যাহত ৰাখিছে বুলি আৰক্ষী সূত্ৰে প্ৰকাশ। উল্লেখ যোগ্য যে , দুষ্ট চক্ৰই ন্যায়ালয়ৰ কঠোৰ আইনকো ভেঙুচালি কি দৰে বন ধ্বংসৰ দৰে দুষ্কাৰ্যত লিপ্ত হব পাৰিছে সেয়া এক ৰহস্যৰ আৱৰ্তত ৷
