Sexual harassment I বিশ্ববিদ্যালয়ৰ অধ্যাপিকাক চাৰি মাহ ধৰি যৌন নিৰ্যাতন! অভিযুক্ত ডীন

বিশ্ববিদ্যালয়ৰ এগৰাকী অধ্যাপিকাক যৌন নিৰ্যাতন (Sexual harassment)  চলোৱাৰ অভিযোগ উত্থাপন হৈছে অধ্যাপকৰ বিৰুদ্ধে। গুৰুগ্ৰাম বিশ্ববিদ্যালয়ত (Gurugram University) সংঘটিত হৈছে এই ঘটনা। অভিযুক্তজন বিশ্ববিদ্যালয়খনৰ ঔষধ বিজ্ঞান বিভাগৰ ডীন। অৱশ্যে এই অভিযোগ তেওঁ অস্বীকাৰ কৰে। সোমবাৰে আৰক্ষীয়ে এই ঘটনা সন্দৰ্ভত অৱগত কৰে।

বিশ্ববিদ্যালয়ৰ শিক্ষয়িত্ৰীগৰাকীয়ে বিগত ৪ মাহ ধৰি যৌন নিৰ্যাতন চলোৱাৰ অভিযোগ দাখিল কৰে। তেওঁৰ অভিযোগ যে ২১ এপ্ৰিলত ডীনগৰাকীয়ে তেওঁৰ শ্ৰেণীত প্ৰৱেশ কৰি অকাৰণতে চিঞৰিছিল। অধ্যাপিকাগৰাকীয়ে অভিযোগ কৰে যে ডীনগৰাকীয়ে নিজৰ যৌন প্ৰয়োজনীয়তা পূৰণৰ বাবে তেওঁক হেঁচা প্ৰয়োগ কৰিছিল।

তদুপৰি অধ্যাপিকাগৰাকীক এদিন শ্ৰেণীলৈ পলম হোৱাৰ বাবেও শাৰীৰিক নিৰ্যাতন চলোৱাৰ অভিযোগ উত্থাপন হৈছে। ২৮ এপ্ৰিলত অধ্যাপিকাগৰাকীয়ে ডীনৰ বিৰুদ্ধে কেৰাণীক তেওঁৰ ঘৰলৈ মাতি আনি তাত যৌন নিৰ্যাতন চলোৱাৰ অভিযোগ উত্থাপন কৰিছিল।

অৱশ্যে অধ্যাপিকাগৰাকীৰ অভিযোগ অস্বীকাৰ কৰে ডীনগৰাকীয়ে। তেওঁ দাবী কৰে যে তেওঁ নিজৰ কামত অৱহেলা কৰিছে। ইয়াৰ বাবে তেওঁক দুবাৰকৈ স্মাৰক-পত্ৰ দিয়া হৈছে। ডীনে দাবী কৰে যে তেওঁ আন কাৰোবাৰ প্ৰৰোচনাত যৌন নিৰ্যাতনৰ অভিযোগ উত্থাপন কৰিছিল। এই ঘটনা সন্দৰ্ভত এতিয়াও বিশ্ববিদ্যালয়ৰ তৰফৰ পৰা কোনো কথা অৱগত কৰা হোৱা নাই।

যোৱা শনিবাৰে ভাৰতীয় দণ্ডবিধিৰ ৩৫৪এ, ৫০৬ ধাৰাত অভিযুক্ত ডীনৰ বিৰুদ্ধে এফআইআৰ দাখিল কৰা হৈছে। ২০১৮ চনতো ডীনৰ বিৰুদ্ধে যৌন নিৰ্যাতনৰ অভিযোগ উত্থাপন হৈছিল। সেই সময়ত তেওঁ কুৰুক্ষেত্ৰ বিশ্ববিদ্যালয়ত কৰ্মৰত আছিল। অৱশ্যে পিছত অভিযোগকাৰীয়ে অভিযোগ প্ৰত্যাহাৰ কৰে।