Sharad pawar | শৰদ পাৱাৰক মৃত্যুৰ ভাবুকি

এনচিপিৰ মুৰব্বী শৰদ পাৱাৰে (Sharad pawar) লাভ কৰিছে ছচিয়েল মিডিয়াত মৃত্যুৰ ভাবুকি। এই অভিযোগ সন্দৰ্ভত শৰদৰ কন্যা সুপ্ৰিয়া চুলেকে (Supriya Sule) ধৰি এনচিপিৰ নেতৃত্বই মুম্বাইৰ আৰক্ষী আয়ুক্ত বিবেক ফানছালকাৰক (Vivek Phansalkar) সাক্ষাৎ কৰে। মুম্বাই আৰক্ষীয়ে জনোৱা মতে, এফআইআৰ দাখিল কৰি তদন্ত আৰম্ভ কৰা হৈছে। মহাৰাষ্ট্ৰৰ উপ-মুখ্যমন্ত্ৰী দেৱেন্দ্ৰ ফাৰনভিছে এই ঘটনাৰ বিষয়ে জানিব পাৰি স্পষ্ট কৰি দিয়ে যে চৰকাৰে কোনো নেতাক ভাবুকি দিয়াটো সহ্য নকৰে।

এনচিপিৰ সাংসদ সুপ্ৰিয়াই দাবী কৰিছে যে ফেচবুক আৰু হোৱাটছএপৰ ৱেবছাইটৰ দ্বাৰা পাৱাৰক ভাবুকি দিয়া হৈছে। ফেচবুক মেছেজত পাৱাৰক ভাবুকি দিয়া হৈছে, “তোমাৰো অৱস্থা শেষত (নৰেন্দ্ৰ) ডাভোলকৰৰ দৰেই হ’ব।”

উল্লেখযোগ্য যে অন্ধবিশ্বাস বিৰোধী আন্দোলনত আগৰণুৱা আছিল নৰেন্দ্ৰ ডাভোলকৰ। ২০ আগষ্টত ২ অচিনাক্ত বাইক আৰোহীয়ে তেওঁক গুলীয়াই হত্যা কৰিছিল। এইবাৰ পাৱাৰৰো একেই অৱস্থা কৰাৰ ভাবুকি দিয়া হৈছে। পাৱাৰৰ কন্যাই মুম্বাইৰ আৰক্ষী অধীক্ষকক লগ কৰি গোটেই ঘটনাটো জনায়। বিবেকে তেওঁক বিহিত ব্যৱস্থা গ্ৰহণ কৰাৰ প্ৰতিশ্ৰুতি দিয়ে।

এই সন্দৰ্ভত মহাৰাষ্ট্ৰ চৰকাৰেও জ্যেষ্ঠ ৰাজনীতিবিদ পাৱাৰক মৃত্যুৰ ভাবুকি দিয়াৰ প্ৰতিক্ৰিয়া প্ৰকাশ কৰিছে। উপ-মুখ্যমন্ত্ৰী ফাৰনাভিছে কয়, ‘কোনো নেতাক ভাবুকি দিয়াটো সহ্য কৰা নহʼব।’ ফাৰনাভিছে দাবী কৰে যে আৰক্ষীক দোষীক বিচাৰি উলিয়াই কঠোৰতম শাস্তি দিবলৈ নিৰ্দেশ দিয়া হৈছে।