ASSAM TIMES POST
নলবাৰী : নাগৰিকত্ব সংশোধনী বিধেয়কৰ বিৰুদ্ধে ৰাজ্যজুৰি প্ৰতিবাদ অব্যাহত আছে৷ আনহাতে নলবাৰী জিলাটো এই বিধেয়কৰ বিৰুদ্ধে প্ৰতিবাদ তীব্ৰ হৈ পৰিছে৷ জিলাখনত অসম গণ পৰিষদৰ তিনিগৰাকী মন্ত্ৰী ক্ৰমে অতুল বৰা, কেশৱ মহন্ত আৰু ফণী ভূষণ চৌধুৰীৰ বিৰুদ্ধে প্ৰতিবাদ তীব্ৰ হৈ পৰিছে৷
এই তিনিজন মন্ত্ৰীৰ বিৰুদ্ধে কোনো অচিনাক্ত সংগঠনে প’ষ্টাৰিং কৰাত ৰাইজৰ মাজত তীব্ৰ প্ৰতিক্ৰিয়াৰ সৃষ্টি হৈছে৷ নলবাৰী মহাবিদ্যালয়ৰ চৌহদৰ বেৰত এই তিনিজন মন্ত্ৰীৰ বিৰুদ্ধে প’ষ্টাৰ মাৰি অচিনাক্ত সংগঠনটোৱে প্ৰতিবাদ সাব্যস্ত কৰে৷ ইপিনে, কালি আছুৰ সদস্যই অসম গণ পৰিষদৰ উপদেষ্টা দিলীপ পাটগিৰিক ঘেৰাও কৰে৷
এখন সভাত অংশগ্ৰহণ কৰিবলৈ যোৱাৰ সময়তে উপদেষ্টা পাটগিৰিক আছুৰ সদস্যই ঘেৰাও কৰে৷ আনহাতে অসম গণ পৰিষদৰ কৰ্মীসকলে দলটোৰ নেতাসকলক নাগৰিকত্ব সংশোধনী বিধেয়কৰ সন্দৰ্ভত স্থিতি স্পষ্ট কৰিবলৈ আহ্বান জনাইছে৷
