ASSAM TIMES POST
ডিফু : নাগৰিকত্ব সংশোধনী বিধেয়ক ২০১৬ ৰ বিৰুদ্ধে বিভিন্ন সংগঠনে কাইলৈ পুৱাৰ পৰা আহ্বান জনোৱা অসম বন্ধলৈ পূৰ্ণ সমৰ্থন জনাইছে কাৰবি আংলঙৰ আঞ্চলিক ৰাজনৈতিক দল অল পাৰ্টি হিল্ছ লীডাৰ কনফাৰেন্স চমুকৈ এপিএইছএলচিয়ে ৷
সংবাদ মাধ্যমলৈ প্ৰেৰণ কৰা এক বিবৃতি যোগে এপিএইছএলচিৰ সভাপতি, আৰু আইনী কোষৰ সম্পাদক ক্ৰমে, অৱসৰ প্ৰাপ্ত আইএছ বিষয়া জন ইংতি কাথাৰ আৰু ছেমছন টেৰণে এক প্ৰেছ বিবৃতি যোগে জানিবলৈ দিয়ে যে বিজেপি চৰকাৰে দেশত জাপি দিব বিচৰা নাগৰিকত্ব সংশোধনী বিধেয়ক ২০১৬ৰ তীব্ৰ বিৰোধিতা কৰে এপিএইছএলচিয়ে ৷
বিতৰ্কিত বিধেয়ক খনে ষষ্ঠ অনুসূচীত এলেকাত আৰু ইনাৰ লাইন পাৰ্মিটযুক্ত এলেকাত প্ৰভাৱ নপৰে বুলি চৰকাৰৰ যুক্তিত তেওঁলোকৰ দলে ভোল নাযায়৷ বিধেয়কখন আইনলৈ পৰিৱৰ্তন হলে অইন ভাৰতীয় নাগৰিকৰ দৰে সংশোধনীৰ জৰিয়তে নাগৰিকত্ব পোৱা সকলেও অনায়াসে এইবোৰ অঞ্চলত প্ৰৱেশ কৰি বসবাস কৰিব ৷
ধৰ্মৰ ভিত্তিত নাগৰিকত্ব সংশোধনী অনৰ্থক আৰু সাম্প্ৰদায়িক সেয়ে বিধেয়ক খন বাতিলৰ দাবীত বিভিন্ন সংগঠনে আহ্বান জনোৱা অসম বন্ধলৈ পূৰ্ণ সমৰ্থন আগবঢ়াইছে বুলি দুয়োগৰাকী নেতাৰ স্বাক্ষৰিত প্ৰেছ বিজ্ঞপ্তিত প্ৰকাশ ৷
