ASSAM TIMES POST
উৎপল দাস, গোলাঘাটঃ ড্ৰাগছৰ বিৰুদ্ধে অব্যাহত আছে গোলাঘাট আৰক্ষীৰ অভিযান। দেওবাৰে গোলাঘাট নগৰৰ শান্তিপুৰত এটা ঘৰত অভিযান চলাই আৰক্ষীয়ে নিচাজাতীয় টেবলেটসহ দুজনক আটক কৰিবলৈ সক্ষম হয়৷
বৃহৎ পৰিমাণৰ টেবলেটসহ আটক হোৱা ধৃত লোকদুজন হ’ল আব্দুল কাদিৰ ওৰফে বুটুজান আৰু মাধৱ বুলি জনা গৈছে। দীৰ্ঘদিন ধৰি বুটুজানে নিজৰ ঘৰত ড্ৰাগছ আৰু নিচা জাতীয় টেবলেটৰ ৰমৰমীয়া বেহা চলাই অহাৰ অভিযোগ উঠিছে৷ আৰক্ষীয়ে
গোপন সূত্ৰৰ পম খেদি এই অভিযান চলাইছিল যদিও ড্ৰাগছৰ গোচৰত পূৰ্বে বুটুজান জেলৰ ভাত খাইছে। কিন্তু তাৰ পিছতো ধৃত বুটুজানে ঘৰতে ড্ৰাগছৰ অবাধ বেহা চলাই নৱ প্ৰজন্মক কোঙা কৰাৰ প্ৰচেষ্টা অব্যাহত ৰাখিছে।
বৰ্তমান আৰক্ষীয়ে দুটাক আটক কৰি তদন্ত অব্যাহত ৰাখিছে৷ ইফালে কিদৰে গোলাঘাটত একাংশ ড্ৰাগছ বেপাৰীয়ে ড্ৰাগছৰ বিশাল সাম্ৰাজ্য গঢ় দিবলৈ সক্ষম হৈছে তাক লৈ বিভিন্ন মহলে প্ৰশ্ন উত্থাপন কৰিছে সচেতন মহলে৷ শেহতীয়াকৈ গোলাঘাটত ড্ৰাগছৰ কবলত পৰি কেইবাজনো মৃত্যু হোৱাৰ উপৰি বহু যুব প্ৰজন্ম চিকিৎসাধীন হ’বলগা হৈছে। ইতিমধ্যে আৰক্ষীয়ে ড্ৰাগছৰ লগত জড়িত প্ৰায় শতাধিক ড্ৰাগছ বেপাৰীক জেললৈ প্ৰেৰণ কৰিছে।
