সমগ্ৰ দেশত জাতিৰ পিতা মহাত্মা গান্ধীৰ ১৫৪ সংখ্যক জন্মজয়ন্তী(Gandhi Jayanti)পালন কৰা হৈ আছে ৷ এই উপলক্ষে আজি ডিফু ক্লাৱত কাৰবি আংলং জিলা লেখিকা সমাজৰ উদ্যোগত উদযাপন কৰা হয় “মৈত্ৰী দিৱস” কাৰবি আংলং জিলা আয়ুক্ত মধুমিতা ভাগৱতী আৰু চহৰখনৰ বিভিন্ন জাতি-জনগোষ্ঠীৰ জ্যেষ্ঠ নাগৰিক আৰু লেখক-লেখিকা সকলৰ উপস্থিত এক গাম্ভীৰ্যপূৰ্ণ পৰিৱেশত এই মৈত্ৰী দিৱস উদযাপন কৰা হয় ৷
উক্ত অনুষ্ঠানৰ পূৰ্বে জাতিৰ পিতা মহাত্মা গান্ধীৰ প্ৰাতৃকৃতিত ধূপ-ধূনা, আৰু পুষ্পাঞ্জলীৰে গভীৰ শ্ৰদ্ধাঞ্জলী নিবেদন কৰা হয় ৷ ইয়াৰ লগতে এগচি বন্তি প্ৰজ্বলনেৰে বাপুজীৰ আত্মাৰ শান্তি কামনা কৰা হয় ৷ ইয়াৰ পিছত গীতা পাঠেৰে শুভাৰম্ভ কৰা হয় সৰ্ব ধৰ্ম প্ৰাৰ্থনা ৷ গীতা, ভাগৱত, কোৰাণ, বাইবেল, গ্ৰন্থ চাহেব আৰু জৈন বৌদ্ধ, লখিমন আদি ধৰ্মৰ প্ৰাৰ্থনাৰে ডিফু ক্লাৱত এক ভক্তি ভৰা পৰিৱেশে বিৰাজ কৰে ৷
ইয়াৰোপৰি দিহানাম, জিকিৰ-জাৰি, আৰু বৰগীত পৰিৱেশনেৰেও উপস্থিত দৰ্শকক আপ্লুত কৰা হয় ৷ সংবাদ মাধ্যমৰ আগত কাৰবি আংলং লেখিকা সমাজৰ সভানেত্ৰী অৰূপা বেথেলে কয়যে, জাতি-বৰ্ণ ধৰ্ম নিৰ্বিশেষে সকলো লোকৰ প্ৰচেষ্ঠাত আজিৰ মৈত্ৰী দিৱসৰ কাৰ্যসূচী সাফল্য মণ্ডিত হৈছে ৷ জাতিৰ পিতা মহাত্মা গান্ধীৰ জন্ম দিনত সৰ্ব ধৰ্ম প্ৰাৰ্থনা কাৰ্যসূচীৰে শান্তি, প্ৰেম আৰু আনন্দৰ বতৰা দিয়া হৈছে ৷
প্ৰাৰ্থনাৰ জৰিয়তে সকলো কাৰ্যসূচী সম্পন্ন কৰিবলৈ নৱ প্ৰজন্মৰ প্ৰতি আহ্বান জনায় সভানেত্ৰী অৰুপা বেথেলে ৷ সৰ্ব ধৰ্মৰ প্ৰাৰ্থনাৰ অন্তত প্ৰাৰ্থনাত অংশ গ্ৰহন কৰা পাঠক সকলক বিশেষভাবে পহ’ আৰু মানপত্ৰৰে সম্বৰ্ধিত কৰে কাৰবি আংলং লেখিকা সমাজে ৷
