কাৰবি আংলং স্বায়ত্তশাসিত পৰিষদৰ (KAAC) এলেকাৰ বিভিন্ন সমস্যাৰ সন্মূখীন হোৱাৰ বাবে গঠন কৰিব নিজাববীয়া এক আৰক্ষী বাহিনী (Police Force)৷ আজি পৰিষদৰ ২৪৬তম ছেচনত পৰিষদৰ মুখ্য কাৰ্যবাহী সদস্য তুলিৰাম ৰংহাঙে (Chief Executive Member Tuliram Ronghang) এই সন্দৰ্ভত এখন বিধেয়ক উপস্থাপন (Introduction of a Bill) কৰে৷
ছেচনৰ অন্তত সংবাদ মাধ্যমৰ আগত ৰংহাঙে এই কথা সদৰি কৰি কয় যে, ষষ্ঠ অনুসূচীভূক্ত পৰিষদ গঠন হোৱাৰ সময়তে পৰিষদৰ সংবিধানত পেৰা-৩ চাব পেৰা এফ যোগে পৰিষদৰ এক্তিয়াৰৰ ভিতৰত থকা অঞ্চলৰ নগৰ আৰু গাওঁ সমূহৰ বাবে (গাওঁ উন্নয়ন পৰিষদ)ৰ বাবে পৰিষদৰ নিজাববীয়া আৰক্ষী বাহিনী গঠনৰ ক্ষমতা অৰ্পণ কৰা হৈছিল৷ যদিও এই সন্দৰ্ভত কোনো ব্যৱস্থা গ্ৰহণ কৰা হোৱা নাছিল ৷ শেহতীয়া পৰিষদৰ কাৰ্যবাহী সভাত এক সিদ্ধান্ত গ্ৰহণ কৰি পৰিষদত বিধেয়ক উত্থাপনৰ সিদ্ধান্ত লোৱা হয়৷ সেই সিদ্ধান্ত মৰ্মে আজি পৰিষদৰ চেছনত বিধেয়ক উত্থাপন কৰা হয় আৰু পৰিষদৰ ২৪৭তম অধিৱেষনত এই বিধেয়ক গৃহীত কৰা হ’ব বুলি ৰংহাঙে প্ৰকাশ কৰে৷
উল্লেখ্য যে, এই আৰক্ষী বাহিনীত প্ৰথম পৰ্যায়ত দুশ নিযুক্তি প্ৰদান কৰা হ’ব৷ এই বাহিনীত পৰিদৰ্শক, উপপৰিদৰ্শসহ চিপাহী থাকিব৷ পৰিষদৰ প্ৰশাসনীয় এলেকা বহুত ডাঙৰ বুলি উল্লেখ কৰি ৰংহাঙে কয় যে, আমাৰ সীমা সমস্যা, অনুপ্ৰৱেশ সমস্যা, কৰ-কাটল সংগ্ৰহৰ সমস্যা, খনিজাত সামগ্ৰীৰ খনি সমূহৰ সুৰক্ষা আদি সমাধানৰ বাবে আমাক নিজাববীয়া এনে এটা বাহিনী প্ৰয়োজন হৈছে৷
আনহাতে এই বাহিনীক অসম চৰকাৰে প্ৰশিক্ষণ প্ৰদানৰ লগতে বন্দুক-বাৰুদ যোগান ধৰাৰ মৌখিক প্ৰতিশ্ৰুতি অসম চৰকাৰৰ পৰা লাভ কৰাৰ কথাও সদৰি কৰে ৰংহাঙে ৷ এই পদক্ষেপক কাৰবি আংলং স্বায়ত্তশাসিত পৰিষদৰ এক ঐতিহাসিক পদক্ষেপ আখ্যা দিয়ে ৰংহাঙে৷ ইয়াৰোপৰি তাৰালাংচৰ সাংস্কৃতিক প্ৰকল্পত বিভিন্ন উন্নয়নমূলক কামৰ ঠিকাদাৰৰ বিল পাবৰ বাবে চেছনত ছাপলিমেণ্ট্ৰি বিধেয়ক দাবী উত্থাপন কৰা হৈছে৷
আনহাতে কাৰবি আংলঙৰ বিভিন্ন ক্ষেত্ৰত অৱদান আগবঢ়োৱা সদ্য প্ৰয়াত বৰচিম ৰংপি, যোগেন্দ্ৰ সিং আৰু প্ৰাণ কুমাৰ দত্তৰ বিদেহি আত্মাৰ সদগতি বিচাৰি শোকবাৰ্তা প্ৰেৰণ কৰে৷
