ASSAM TIMES POST
নিউজ ডেস্ক
আমেৰিকাৰ বিৰুদ্ধে ভয়ঙ্কৰ প্ৰতিশোধ লোৱাৰ ধমকি দিলে ইৰানৰ শীর্ষ নেতা আয়াতুল্লা আলী খামেনিৰ। তেওঁ কয়, মার্কিন ড্রোণ আক্ৰমণত ইৰানৰ ৰিভোলুচনাৰী গার্ড কোৰৰ কাডছ ফৰ্চৰ কমাণ্ডাৰ জেনেৰেল কাচেম চোলেমানিৰ মৃত্যুৰ পিছত ‘জিহাদ’ আৰু বাঢ়িব। আৰু সেই ‘পবিত্র যুদ্ধ’ত জয়ী হ’ব ‘জিহাদি’সকলেই।
শুকুৰবাৰে পুৱতি নিশা বাগদাদ আন্তর্জাতিক বিমানবন্দৰৰ কাষত মার্কিন ড্রোণ আক্ৰমণত নিহত হয় জেনেৰেল কাচেম চোলেমানি। তেওঁৰ সৈতে প্রাণহানি হয় ইৰাকী সন্ত্ৰাসবাদী সংগঠনৰ উপ-প্রধান আবু মহদি আল-মুহান্দিচ ওৰফে জামাল জাফৰ ইব্রাহিমিসহ ৬জনৰ।
আজি টুইটযোগে ইৰানৰ শীর্ষ নেতা আয়াতুল্লা আলী খামেনিয়ে কয়, ‘‘বিগত কেইবা বছৰ ধৰি যি নিৰলস কাম-কাজ কৰি গৈছে, কালি ছহিদ হৈ তাৰ পুৰস্কাৰ লাভ কৰে চোলেমানিয়ে।’’ উল্লেখ যে চোলেমানিৰ মৃত্যুত ইৰানত তিনি দিনিৰ ৰাষ্ট্রীয় শোক পালনৰ সিদ্ধান্ত ঘোষণা কৰিছে খামেনিয়ে।
পিছত ইৰানৰ চৰকাৰী টেলিভিছনত খমেনিয়ে কয়, ‘‘চোলেমানি গুচি গ’ল বুলি তেওঁৰ কাম বাতিল নহয়। তেওঁৰ পথেই অনুসৰণ কৰা হ’ব। আৰু যিসকল অপৰাধীৰ হাত চোলেমানি তথা অন্য ছহিদসকলৰ ৰক্তেৰে ৰঙা হ’ল, তেওঁলোকৰ বিৰুদ্ধে শীঘ্রেই প্ৰতিশোধ লোৱা হ’ব।’’
টেলিভিছনত খামেনিৰ ধমকি, ‘‘শত্ৰুৱে জানি থোৱা উচিত, ইয়াৰ পিছত ইৰানৰ জিহাদ আৰু বাঢ়িব। আৰু সেই পবিত্র যুদ্ধত জিহাদিসকলেই জয়ী হ’ব।’’
আনহাতে, আমেৰিকাৰ বিৰুদ্ধে টোপ গাজিছে ইৰানৰ ৰাষ্ট্ৰপতি হাচান ৰৌহানিয়েও। তেওঁ কয়, ‘‘চোলেমানি ছহিদ হোৱাই আমেৰিকাক ৰুধিবলৈ তথা ইছলামী মূল্যবোধ ৰক্ষাত অধিক দৃঢ়প্রতিজ্ঞ হ’ব ইৰান। এই অঞ্চলত ইৰানৰ দৰে যিসমূহ দেশে আমেৰিকাৰ কুক্ষিগত হৈ থাকিব নিবিচাৰে, কোনো সন্দেহ নাই, তেওঁলোক সকলোৱেই ইয়াৰ প্ৰতিশোধ ল’ব।’’
ইফালে ইৰানৰ বিদেশমন্ত্রী জাভেদ জাৰিফৰ কণ্ঠতো একেই সুৰ। মার্কিন ড্রোণ আক্ৰমণক ‘আন্তর্জাতিক সন্ত্রাসবাদ’ বুলি তেওঁ গৰিহণা দিয়ে। ‘আগন্তুক দিনত আমেৰিকাই ইয়াৰ মূল্য দিব লাগিব’ বুলি টুইটত সাৱধানবাণী শুনায় ইৰানৰ বিদেশমন্ত্রীগৰাকীয়ে।
