নিট প্ৰশ্নকাকত ফাদিল (NEET Paper leak) সন্দৰ্ভত শনিবাৰে আন এজন ব্যক্তিক গ্ৰেপ্তাৰ কৰা হৈছে। উত্তৰ প্ৰদেশ আৰক্ষীৰ বিশেষ টাস্ক ফ’ৰ্চে (এছটিএফ) গ্ৰেটাৰ নয়ডাৰ পৰা ৰবি অত্ৰী নামৰ এজন লোকক গ্ৰেপ্তাৰ (One Ravi Atri arrested in Greater Noida) কৰিছে। আৰক্ষী সূত্ৰ মতে, ৰবি নিট কেলেংকাৰীৰ অন্যতম মাষ্টাৰমাইণ্ড (One of the masterminds of NEET scam)। কেৱল সেয়াই নহয়, এই পৰীক্ষাৰ প্ৰশ্নকাকত ফাদিল হোৱাৰ আঁৰত ‘ছলভাৰ গেং’ জড়িত আছে। ৰবি হৈছে দলটোৰ অন্যতম মুৰব্বী।
উল্লেখযোগ্য যে পাটনা আৰক্ষীয়ে শুকুৰবাৰে ঝাৰখণ্ডৰ দেওঘৰৰ পৰা চিকন্দৰ যাদৱ নামৰ এজন সন্দেহজনক ব্যক্তিসহ পাঁচজন লোকক কেলেংকাৰীটোত জড়িত থকাৰ অভিযোগত গ্ৰেপ্তাৰ কৰে। ইয়াৰ পূৰ্বে গোচৰটোত আৰু ১৩ জন লোকক গ্ৰেপ্তাৰ কৰা হৈছে। কেলেংকাৰীটোত গ্ৰেপ্তাৰ হোৱা লোকৰ সংখ্যা এতিয়ালৈকে ১৯ জনলৈ বৃদ্ধি পাইছে। আৰক্ষীয়ে জনোৱা অনুসৰি, নিট কেলেংকাৰীত অতুল বচ্চ, চিকন্দৰ যাদৱ, সঞ্জীৱ মুখিয়া আৰু ৰবি অত্ৰিৰ নামো আছিল। অনুসন্ধানৰ সময়ত আৰক্ষীয়ে জানিব পাৰিছিল যে ৰবিয়ে প্ৰশ্নকাকত ফাদিল কৰিবলৈ তেওঁৰ দলটো ব্যৱহাৰ কৰিছিল।
অনুসন্ধানকাৰীসকলে দাবী কৰিছে যে অতুল বচ্চ আৰু সঞ্জীৱ মুখিয়াই বিহাৰৰ পাটনা আৰু নালন্দাত প্ৰশ্নকাকত ফাদিল কৰিছিল। আৰক্ষীয়ে ইতিমধ্যে সঞ্জীৱক গ্ৰেপ্তাৰ কৰিছে। কিন্তু অতুলৰ কোনো সন্ধান পোৱা হোৱা নাই। ৰবিৰো সন্ধানত আছিল আৰক্ষী। অৱশেষত শনিবাৰে গ্ৰেটাৰ নয়ডাৰ নিমকা গাঁৱৰ পৰা তেওঁক গ্ৰেপ্তাৰ কৰে আৰক্ষীয়ে।
ৰবিয়ে সৃষ্টি কৰা নেটৱৰ্কটোৰ নাম ‘ছলভাৰ গেং’। ৰবিৰ বিৰুদ্ধে সামাজিক মাধ্যমৰ জৰিয়তে বিভিন্ন পৰীক্ষাৰ প্ৰশ্নকাকত ফাদিল কৰাৰ অভিযোগ আছে। অৱশ্যে এইটোৱে প্ৰথমবাৰৰ বাবে নহয়, ৰবিৰ প্ৰশ্নকাকত ফাদিলৰ সাম্ৰাজ্য বাৰ বছৰ আগতে আৰম্ভ হৈছিল। চিকিৎসা প্ৰৱেশ পৰীক্ষাৰ প্ৰশ্নকাকত ফাদিল কৰাৰ বাবে ২০১২ চনত দিল্লী আৰক্ষীয়ে তেওঁক গ্ৰেপ্তাৰো কৰিছিল।
কিন্তু কোন এই ৰবি? আৰক্ষীয়ে জনোৱা অনুসৰি, ৰবিয়ে নিজেই নিট পৰীক্ষাৰ বাবে প্ৰস্তুতি চলাই আছিল। ২০০৭ চনত তেওঁৰ পৰিয়ালে তেওঁক চিকিৎসা প্ৰৱেশ পৰীক্ষাৰ বাবে প্ৰস্তুতি কৰিবলৈ ৰাজস্থানৰ কোটালৈ পঠিয়াইছিল। এই সময়তে তেওঁ ‘ছলভাৰ গেং’ৰ সংস্পৰ্শলৈ আহিছিল। তেওঁ ২০১২ চনত নিটত উত্তীৰ্ণ হৈছিল। তাৰ পিছত তেওঁ হাৰিয়ানাৰ ৰোহতকত পিজিআইত যোগদান কৰে। কিন্তু তেওঁ মাজতে পঢ়া বন্ধ কৰিলে। আৰু সেই সময়ত তেওঁৰ ওপৰত প্ৰশ্নকাকত ফাদিল কৰাৰ অভিযোগ উত্থাপিত হয়। তেওঁক দিল্লী আৰক্ষীয়ে গ্ৰেপ্তাৰ কৰিছিল। আৰক্ষীৰ মতে, ৰবি সেই সময়ত ‘পৰীক্ষা মাফিয়া’ৰ সংস্পৰ্শলৈ আহিছিল। আনৰ বাবে পৰীক্ষাৰ বাবে বহে। তাৰ পিছত তেওঁ প্ৰশ্নকাকত ফাদিলৰ চক্ৰত জড়িত হৈ পৰে। তেতিয়াৰ পৰা ৰবিয়ে তেওঁৰ সাম্ৰাজ্যৰ জাল সম্প্ৰসাৰিত কৰে আৰু এইবাৰ পুনৰ আৰক্ষীৰ জালত পৰিল।
