নিটৰ প্ৰশ্নকাকত ফাদিল গোচৰ (Neet Paper Leak Case)ত ইতিমধ্যে আৰক্ষীয়ে ১৩ জন লোকক গ্ৰেপ্তাৰ (13 people arrested) কৰিছে। এইবাৰ ঝাৰখণ্ডৰ পৰা গ্ৰেপ্তাৰ (Arrested from Jharkhand) কৰা হৈছে এই গোচৰৰ মূল সন্দেহযুক্ত চিকন্দৰ যাদবেন্দ্ৰকে ধৰি পাঁচজন লোকক। বিহাৰ আৰক্ষীয়ে শুকুৰবাৰে দেওঘৰৰ পৰা আটক কৰে চিকন্দৰসহ চাৰিজন লোকক। ইয়াৰ ফলত নিট কেলেংকাৰিত গ্ৰেপ্তাৰৰ সংখ্যা ১৮ জনলৈ বৃদ্ধি পায়। দেওঘৰ আৰক্ষীয়ে জানিবলৈ দিয়া মতে, ধৃত পাঁচজনক সোধা-পোছাৰ বাবে পাটনালৈ লৈ যোৱা হৈছে।
তদন্তকাৰীৰ মতে নিটৰ প্ৰশ্নকাকত প্ৰথমে হাজাৰিবাগৰ এটা কেন্দ্ৰৰ পৰা ফাদিল হৈছিল। ইয়াৰ পিছত প্ৰশ্নকাকতখন আন ঠাইত বিয়পি পৰে। আৰক্ষীৰ সূত্ৰ অনুসৰি, এই কেলেংকাৰিৰ মূল সন্দেহজনক চিকন্দৰ। এক সৰ্বভাৰতীয় সংবাদ মাধ্যমত প্ৰকাশিত এক বাতৰি অনুসৰি, সোধা-পোছাৰ সময়ত চিকন্দৰে স্বীকাৰ কৰে যে তেওঁ অমিত আনন্দ আৰু নীতিশ কুমাৰ নামৰ দুজন ব্যক্তিৰ পৰা নিট প্ৰশ্নকাকত ৩০ লাখ টকাত ক্ৰয় কৰিছিল। ইয়াৰ পিছতে তেওঁ প্ৰশ্নকাকতখন সমষ্টিপুৰৰ অনুৰাগ যাদৱ, দানাপুৰৰ আয়ুষ কুমাৰ, গয়াৰ শিৱানন্দ কুমাৰ আৰু ৰাণ্টীৰ অভিষেক কুমাৰক ৪০ লাখ টকাত বিক্ৰী কৰে।
তদন্তকাৰীয়ে এই কথাও জানিব পাৰিছে যে এই পৰীক্ষাৰ্থীসকলে ৪ মে’ৰ নিট পৰীক্ষাৰ পূৰ্বে পাটনাৰ ৰামকৃষ্ণনগৰত প্ৰশিক্ষণ লৈছিল। আৰক্ষীৰ মতে, চিকন্দৰৰ বাহিৰেও গ্ৰেপ্তাৰ হোৱা লোকসকলৰ ভিতৰত আছে নিট পৰীক্ষাৰ্থী অনুৰাগ যাদৱ, নীতিশ কুমাৰ আৰু অমিত আনন্দ। আৰক্ষীৰ সূত্ৰ অনুসৰি, গ্ৰেপ্তাৰ হোৱা প্ৰাৰ্থীসকলে পৰীক্ষাৰ আগদিনা প্ৰশ্নকাকত পোৱা বুলি স্বীকাৰ কৰে আৰু সেই প্ৰশ্নৰ উত্তৰো মুখস্থ কৰিছিল।
ইফালে প্ৰশ্নকাকত ফাদিল গোচৰত নাম ওলোৱা ছিকন্দৰক বিহাৰ আৰক্ষীয়ে তেওঁক বিচাৰি আছিল। শুকুৰবাৰে পাটনা আৰক্ষীয়ে গোপনীয় সূত্ৰৰ পৰা তথ্য লাভ কৰে যে চাৰিওজন সন্দেহযুক্ত লোকে দেওঘৰৰ এটা ঘৰত আশ্ৰয় লৈছে। সেই খবৰ পাই পাটনা আৰক্ষীয়ে ঝাৰখণ্ডলৈ যায়। প্ৰশ্নকাকতৰ বাবে ৩০ জন নিট প্ৰাৰ্থীৰ প্ৰতিজনৰ পৰা ৩০-৫০ লাখ টকা লোৱা ঠাইৰ ঠিকনা লাভ কৰে। ইয়াৰ পিছতে চিকন্দৰকে ধৰি পাঁচজন লোকক গ্ৰেপ্তাৰ কৰা হয়।
