৯ আগষ্ট তাৰিখে সমগ্ৰ বিশ্বত উদযাপিত হোৱা “আন্তঃৰাষ্ট্ৰীয় খিলঞ্জীয়া দিৱস” ৰ সৈতে সংগতি ৰাখি ৰাজ্যৰ অগ্ৰণী অনুষ্ঠান অসম লেখিকা সমাজে গ্ৰহণ কৰিছে এক পদক্ষেপ। শুকুৰবাৰে ডিফু ক্লাবত দিনজোৰা কাৰ্যসূচীৰে এক গাম্ভীৰ্যপূৰ্ণ পৰিৱেশত ‘মাটি-মানুহ-সমন্বয়‘ দিৱস উদযাপন কৰে।
এই অনুষ্ঠানৰ কাৰ্যসূচী অনুসৰি পুৱা ভাগত পঞ্জীয়ন আৰু বন্তি প্ৰজ্জ্বলন কাৰ্যসূচী সমাপন কৰা হয়। তাৰ সমান্তৰালকৈ, গছপুলি ৰোপণ, থলুৱা শিল্প প্ৰদৰ্শনী তথা কবিতা পাঠৰ কাৰ্যসূচীও এই অনুষ্ঠানত ৰূপায়ণ কৰা হয়। দুপৰীয়াৰ ভাগত মুকলি সভাও অনুষ্ঠিত হয়।
অসম লেখিকা সমাজৰ সভাপতি পদুমী গগৈয়ে আঁত ধৰা মুকলি সভাত অসম সাহিত্য সভাৰ প্ৰাক্তন সভাপতি ৰংবং তেৰাং, বিজয়া পায়েং, ড০ জ্যোতি প্ৰসাদ শইকীয়া, বিশিষ্ট লেখক-সাংবাদিক পবিত্ৰ বৰা প্ৰমুখ্যে কেইবাগৰাকী বিশিষ্ট সাহিত্যিক, সাংবাদিক, লগতে জিলা উপায়ুক্ত নিৰলা ফাংচপীও উপস্থিত থাকে।
আজিৰ এই অনুষ্ঠানৰ মুকলি সভাত অভ্যাগতসকলৰ উপস্থিতিত অসম লেখিকা সমাজে প্ৰৱৰ্তন কৰা মুক্তিযুঁজাৰু দেউৰাম দত্ত সোঁৱৰণি ‘মহীয়ান বঁটা‘ অসম সাহিত্য সভাৰ প্ৰাক্তন সভাপতি তথা পদ্মশ্ৰী ৰংবং তেৰাঙক আৰু লোকবন্ধু লম্বোধৰ কামান সোঁৱৰণি ‘মাটি-মানুহ-সমন্বয় বঁটা‘ বিশিষ্ট লেখক, শিক্ষাবিদ বিজয়া পায়েঙক প্ৰদান কৰা হয়। ইয়াৰোপৰি, সমাজৰ বিভিন্ন ক্ষেত্ৰলৈ অনবদ্য বৰঙণি আগবঢ়োৱা ৯গৰাকী ব্যক্তিক সন্মান জনোৱা হ‘ব বুলি জানিবলৈ দিয়ে। এই অনুষ্ঠানৰ লগত সংগতি ৰাখি স্মৰণিকা ‘প্ৰয়াস‘ আৰু জয়শ্ৰী শইকীয়াৰ নৱতম গ্ৰন্থ ‘নক্ষত্ৰ‘ উন্মোচন কৰা হয়।
