অসমৰ মেপৰ আৰ্হিৰ ভেলাঘৰৰ তলত গীত-মাতেৰে প্ৰতিবাদ
ASSAM TIMES POST
নগাঁওঃ ভোগালী বিহুৰ আনন্দ-উল্লাসক নেওচি নগাঁও জিলাৰ বাংঠাই গাঁৱৰ ৰাইজে অসমৰ মেপৰ আৰ্হিৰ ভেলাঘৰৰ তলত প্ৰতিবাদী কাৰ্যসূচী ৰূপায়ন কৰে । দক্ষিণ-পশ্চিম নগাঁও আঞ্চলিক ছাত্ৰ সন্থা আৰু বাংঠাই গাঁও লাচিত যুৱক সংঘৰ উদ্যোগত কালি ভোগালী বিহুৰ দিনাই বাংঠাই গাঁৱত নাগৰিকত্ব(সংশোধনী)আইনৰ প্ৰতিলিপি দাহ কৰা আৰু আইনখন বাতিলৰ দাবীত প্ৰতিবাদী সভা অনুষ্ঠিত হয়।
অনুষ্ঠানটোত শিল্পী,শিক্ষাবিদ,সাংবাদিক সকলৰ লগতে স্থানীয় ৰাইজে বিপ্লৱী গীত,কবিতা,ভাষনৰে নাগৰিকত্ব(সংশোধনী)আইন বাতিলৰ দাবী জনোৱাৰ লগতে বিজেপি চৰকাৰৰ স্বেচ্ছাচাৰীতাক প্ৰতিবাদ জনায়।তাৎপৰ্যপূৰ্ণ যে নগাঁও জিলা ছাত্ৰ সন্থাৰ উপসভাপতি পংকজ বৰাৰ তৎপৰতাত দক্ষিণ-পশ্চিম নগাঁও আঞ্চলিক ছাত্ৰ সন্থা আৰু বাংঠাই গাঁও লাচিত যুৱক সংঘই এই প্ৰতিবাদী কাৰ্যসূচী ৰূপায়ন কৰিছিল বাংঠাইৰ অসমৰ মেপৰ আৰ্হিত প্ৰতীকি ভেলাঘৰ নিৰ্মাণ কৰা স্থানত।
এই ভেলাঘৰ নিৰ্মাণ কৰিছিল বাংঠাই গাঁও লাচিত যুৱক সংঘৰ সভাপতি-সম্পাদক ক্ৰমে অভিজিৎ বৰদলৈ আৰু ৰবিশংকৰ বৰদলৈৰ লগতে নৱজ্যোতি বৰদলৈ,পৰমানন্দ ৰাজবংশী,ধনমনি বৰদলৈ,বিজু বৰদলৈ,হৰিকমল বৰদলৈ,প্ৰশান্ত বৰদলৈ,বাপকন বৰদলৈ,নীলকমল বৰদলৈ,পাৰ্থপ্ৰতীম বৰদলৈয়ে।অসমৰ মেপৰ আৰ্হিত আৰু ওপৰত লাচিতৰ মূৰ্তিৰ আৰ্হিত খেৰ আৰু বাঁহৰে নিৰ্মাণ কৰা এই ভেলাঘৰটোৰ বিষয়ে অসমৰ সংবাদ মাধ্যমৰ লগতে ৰাষ্ট্ৰীয় পৰ্যায়ৰ সংবাদ মাধ্যমটো প্ৰচাৰ হৈছিল।ভোগালী বিহুৰ দিনা সেই স্থানতে অনুষ্ঠিত প্ৰতিবাদী কাৰ্যসূচীত অংশগ্ৰহণ কৰি নগাঁও প্ৰেছ ক্লাৱৰ সম্পাদক চন্দনজ্যোতি বৰাই অসমৰ জাতীয় স্বাভিমানক পদাঘাত কৰিব বিচৰা এই খন চৰকাৰক উৎখাত কৰিবলৈ বাংঠাই গাঁৱত নিৰ্মিত অসমৰ মেপৰ আৰ্হিৰ ভেলাঘৰৰ স্থানৰ পৰাই প্ৰতিজ্ঞাবদ্ধ হোৱা উচিত বুলি মন্তব্য কৰে।
অনুষ্ঠানটোত অংশগ্ৰহণ কৰি গ্ৰন্থ প্ৰকাশক প্ৰাঞ্জল কুমাৰ মহন্তই জাতিৰ স্বাৰ্থত সংগ্ৰাম কৰিবলৈ অহা অসমীয়াই কাকো ভয় নকৰে বুলি কয়।নগাঁও জিলা ছাত্ৰ সন্থাৰ উপসভাপতি পংকজ বৰাই আঁত ধৰা প্ৰতিবাদী অনুষ্ঠানত শিল্পী দিলীপ শইকীয়া,তৰুণ শইকীয়া,কুমাৰ কিশোৰ,মিন্টু বৰদলৈ,অভিজিৎ বৰদলৈয়ে গীত পৰিবেশন কৰাৰ লগতে গৌৰৱ ডেকাই কবিতা আবৃত্তি কৰে।অনুষ্ঠানত শ্ৰীমন্ত শংকৰদেৱ সংঘৰ নগাঁও জিলা সমিতিৰ সহ সম্পাদক মনোজ ডেকা,শিক্ষাবিদ প্ৰতাপ সিং,যাদৱ বৰাৰ লগতে লৱ শৰ্মা,পুস্পেন্দ্ৰ দাস,লম্বোদৰ ৰাজবংশী আৰু সাংবাদিক প্ৰাঞ্জল বৰদলৈয়ো ভাষন প্ৰদান কৰে।প্ৰতিবাদী কাৰ্যসূচীত নগাঁও জিলা ছাত্ৰ সন্থাৰ সহ সম্পাদক নিপন শৰ্মা, দক্ষিণ-পশ্চিম নগাঁও আঞ্চলিক ছাত্ৰ সন্থাৰ সভাপতি বিমান বৰকাকতী,সম্পাদক মৃদুল বৰুৱা,উপসভাপতি কল্পজ্যোতি বৰা,বাংঠাই গাঁও লাচিত যুৱক সংঘৰ সভাপতি অভিজিৎ বৰদলৈ,সম্পাদক ৰবিশংকৰ বৰদলৈৰ লগতে কৰ্মকৰ্তা সকল উপস্থিত থাকে।
অনুষ্ঠানৰ শেষত ৰাইজে অসমৰ মেপৰ আৰ্হিত নিৰ্মিত ভেলাঘৰৰ তলত ডঃ ভূপেন হাজৰিকাৰ ‘আহ আহ ওলাই আহ সজাগ জনতা শীৰ্ষক গীতটো গাই ‘কা’ বিৰোধী সংগ্ৰাম তীব্ৰতৰ কৰাৰ বাবে সংকল্পবদ্ধ হয়।ইপিনে নগাঁও জিলা ছাত্ৰ সন্থাই নগাঁও এপেক্স বেংকৰ ওচৰত মেজিৰ জুইত ‘কা’ৰ প্ৰতিলিপি দাহ কৰে।অনুষ্ঠানটোত জিলা ছাত্ৰ সন্থাৰ সভাপতি গৌৰিশংকৰ শইকীয়া,সম্পাদক অমৰজ্যোতি ফুকন উপস্থিত থাকে।আন্ত:পাঠৰি আঞ্চলিক ছাত্ৰ সন্থাৰ প্ৰতিবাদী কাৰ্যসূচীত অমৰজ্যোতি ফুকন আৰু মুবিনুৰ ৰহমান উপস্থিত থাকে।হাতীচোং আঞ্চলিক ছাত্ৰ সন্থাৰ কাৰ্যসূচীত ছাত্ৰ নেতা নিপন শৰ্মা উপস্থিত থাকে।একেদৰে ৰহা,ৰাইদঙীয়া,ধিং,বটদ্ৰৱা,উৰিয়াগাঁও,কামপুৰ আদিতো ছাত্ৰ সন্থাৰ সদস্য সকলে মেজিৰ জুইত নাগৰিকত্ব (সংশোধনী) আইনৰ প্ৰতিলিপি দাহ কৰে।
ইপিনে অখিল গগৈকে ধৰি ‘কা’ বিৰোধী আন্দোলনত গ্ৰেপ্তাৰ হোৱা সকলৰ মুক্তিৰ দাবীত কৃষক মুক্তি সংগ্ৰাম সমিতিৰ নগাঁও জিলা সমিতিয়ে উৰুকাৰ দিনাৰ পৰা ভোগালী বিহুৰ দিনালৈকে অনশন কাৰ্যসূচী ৰূপায়ন কৰে।অনশন কাৰ্যসূচীত সত্তৰোদ্ধৰ প্ৰদীপ পাটৰ , দিলীপ বৰদলৈ, দুলুমনি বৰাই অংশগ্ৰহন কৰে।
অনশনৰ পিচত বিশিষ্ট সমাজবাদী নেতা অমৰেন্দ্ৰ শৰ্মা, সমাজসেৱক মুকুট চন্দ্ৰ ভূঞা আৰু অসম জাতীয়তাবাদী যুৱ ছাত্ৰ পৰিষদৰ নগাঁও জিলা সমিতিৰ সম্পাদক প্ৰাগজ্যোতিষ বনিয়াই ফলৰ ৰস আৰু তিল পিঠা খোৱাই অনশন ভাঙে৷কাৰ্যসূচীত কৃষক মুক্তি সংগ্ৰাম সমিতিৰ নগাঁও জিলা সমিতিৰ সম্পাদক জীতেন বৰা, ডঃ ৰিয়াজুদ্দিন আহমেদ, কবি বুবুল শৰ্মা, অধিবক্তা পাৰ্থপ্ৰতীম বৰবৰা, চিপিএমৰ নেতা গোবিন নাথ,যুৱ ছাত্ৰ পৰিষদৰ নগাঁও জিলা সমিতিৰ উপদেষ্টা মনোজ সিংহ ৰাজা,নগৰ সমিতিৰ সভাপতি কাশ্যপ ফুকন,জ্যেষ্ঠ সাংবাদিক পলাশপ্ৰতীম হাজৰিকা, সাংবাদিক চন্দনজ্যোতি বৰাৰ লগতে লগতে যুৱ ছাত্ৰ পৰিষদ আৰু কৃষক মুক্তি সংগ্ৰাম সমিতিৰ সদস্য সকলেও সহযোগিতা কৰে।
