ASSAM TIMES POST
নগাঁওঃ নগাঁও চহৰৰ পাৰ্শ্বৱৰ্তী মৰিকলং ধেপাজানত আজি আন্তঃপাঠৰি আঞ্চলিক ছাত্ৰ সন্থাৰ উদ্যোগত নাগৰিকত্ব (সংশোধনী) আইন বিৰোধী গাঁওসভা অনুষ্ঠিত হয়।মৰিকলং ধেপাজানৰ অসমী পুঁথিভড়াল প্ৰাংগনত অনুষ্ঠিত সভাখনত অংশগ্ৰহন কৰি বিশিষ্ট গল্পকাৰ শিৱানন্দ কাকতিয়ে নাগৰিকত্ব (সংশোধনী) আইনৰ ভয়াবহতাৰ সম্পৰ্কত বাখ্যা দাঙি ধৰি চৰকাৰৰ স্বেচ্ছাচাৰীতাৰ বিৰুদ্ধে সকলোকে একত্ৰিত হৈ মাৰ বান্ধি থিয় হবলৈ আহ্বান জনায় ।সভাত অংশগ্ৰহন কৰি সদৌ নগাঁও জিলা ছাত্ৰ সন্থাৰ সম্পাদক অমৰজ্যোতি ফুকনে কয় যে আমি ২০২১ চনত বিজেপিক উৎখাৎ কৰিব লাগিব।বিজেপি দলে যি সাম্প্ৰদায়িকতাৰ ৰাজনীতি কৰিছে সেই ৰাজনীতি আমি উফৰাই পেলাব লাগিব।আমাৰ প্ৰথম পৰিচয় অসমীয়া।
নগাঁও প্ৰেছ ক্লাৱৰ সম্পাদক চন্দনজ্যোতি বৰাই কয় যে অসমৰ ইতিহাসত হিন্দু-মুছলমানৰ সমন্বয় সোণালী আখৰৰে লিপিবদ্ধ হৈ আছে।বিজেপিৰ সাম্প্ৰদায়িকতাবাদী কূট কৌশলে ইয়াক বিনষ্ট কৰিব নোৱাৰে।আমি এক হৈ আছিলো,এক হৈ থাকিম। এক হৈয়ে আমি অসমৰ ভাষা-সংস্কৃতি ধ্বংস কৰিব বিচৰা সকলো অপশক্তিৰ বিৰুদ্ধে যুঁজ দিম।সভাত যুৱ উদ্যোগী প্ৰাণজিৎ বৰাই ভাতৃত্ববোধ আৰু সমন্বয় ৰক্ষা কৰি চলিবলৈ সকলোকে আহ্বান জনায়।
স্থানীয় মছজিদ সমিতিৰ সাধাৰণ সম্পাদক মুকিদুৰ ৰহমানে আঁত ধৰা সভাখনত ইফটিকাৰ ৰহমান নামৰ যুৱকজনে কবিতা আবৃতি কৰে।ইপিনে অসম জাতীয়তাবাদী যুৱ ছাত্ৰ পৰিষদৰ পুৰণিগুদাম আঞ্চলিক সমিতিয়ে পুৰণিগুদামৰ কেঞাপট্টি, বৰপানীগাঁও, খাটোৱাল,চামগুৰি বজাৰ, গড়মূৰ, মহপৰা, চলচলি,হালোৱাগাঁও আদি অঞ্চলত পথ সভা অনুষ্ঠিত কৰে।সংগঠনটোৱে সেই অঞ্চলকেইটাত নাগৰিকত্ব(সংশোধনী)আইনৰ বিৰুদ্ধে জনজাগৰণ যাত্ৰাও কৰে।পথ সভাত যুৱ ছাত্ৰ পৰিষদৰ নগাঁও জিলা সমিতিৰ উপদেষ্টা মনোজ সিংহ ৰাজা,সভাপতি দীপমনি বৰা,সম্পাদক প্ৰাগজ্যোতিষ বনিয়া,সাংগঠিক সম্পাদক প্ৰবাল শৰ্মা,নগাঁও উকীল সন্থাৰ সভাপতি এ এইচ খণ্ডকাৰ উপস্থিত থাকে।
