দেওবাৰে পুৱা ৯ বজাত ডিফুৰ চৰকাৰী বালক উচ্চতৰ মাধ্যমিক বিদ্যালয়ৰ খেল পথাৰত ৭৬ সংখ্যক গণৰাজ্য দিৱসৰ পতাকা উত্তোলন কৰে কাৰবি আংলং স্বায়ত্তশাসিত পৰিষদৰ চিইএম তুলিৰাম ৰংহাঙে ৷ সমগ্ৰ দেশৰ লগতে পাহাৰীয়া জিলা কাৰবি আংলঙতো বৰ্ণাঢ্য কাৰ্যসূচীৰে উদযাপন কৰা হয় ৭৬ সংখ্যক গণৰাজ্য দিৱস ৷
দেওবাৰে পুৱাৰ ভাগত বিভিন্ন অনুষ্ঠান প্ৰতিষ্ঠানত ত্ৰিৰংগা পতাকা উত্তোলনৰ পিছত ডিফুস্থিত গান্ধী পাৰ্কত থকা শ্বহীদ বেদীত শ্বহীদ সকললৈ পুষ্পাঞ্জলীৰে গভীৰ শ্ৰদ্ধাঞ্জলী জ্ঞাপন কৰে কাৰবি আংলং স্বায়ত্বশাসিত পৰিষদৰ মুখ্য কাৰ্যবাহী সদস্য ডঃ তুলিৰাম ৰংহাঙ নেতৃত্বাধীন টীম কাৰবি আংলঙে ৷তেওঁৰ লগত থাকে জিলা আয়ুক্ত নিৰলা ফাংচপী আৰু আৰক্ষী অধীক্ষক সঞ্জীৱ কুমাৰ শইকীয়া৷
মুখ্য কাৰ্যবাহী সদস্য ডঃ তুলিৰাম ৰংহাঙে প্ৰথমতে ভাৰতবৰ্ষক এখন স্বাধীন গণৰাজ্য দিৱস হিছাপে প্ৰতিষ্ঠা কৰিবলৈ প্ৰাণাহুতি দিয়া স্বাধীনতা সংগ্ৰামী আৰু অনান্য নেতা সকলক শ্ৰদ্ধাৰে সোঁৱৰে ৷ জিলাখনৰ জাতি ধৰ্ম, বৰ্ণ নিৰ্বিশেষে সকলোৰে সমবিকাশ কৰাত তেওঁ প্ৰতিশ্ৰুতিবদ্ধ বুলি কয় ৷ লগতে তুলিৰাম ৰংহাঙে বিজেপি চৰকাৰৰ জন কল্যাণমূখী আঁচনিৰ খতিয়ান দাঙি ধৰে ৷ ইয়াৰ পিছত বিভিন্ন সাংস্কৃতিক দলৰ নৃত্য গীত প্ৰদৰ্শন কৰাৰ লগতে বিভিন্ন বিভাগৰ টেবলয়ড সমূহো প্ৰদৰ্শন কৰি দৰ্শকৰ দৃষ্টি আকৰ্ষণ কৰা হয় ৷
