ASSAM TIMES POST
ডিফুঃ ডিফুত অসম আৰক্ষীৰ দূৰ্নিতী নিবাৰক শাখাই কাৰবি আংলং স্বায়ত্তশাসিত পৰিষদৰ বন বিভাগৰ প্ৰধান মুখ্য বন সংৰক্ষক অভিজিৎ ৰাভাৰ ডিফুৰ চৰকাৰী বাসভৱন আৰু কাৰ্যালয়ত তালাচী চলায় ৷
সমান্তৰালভাৱে শীৰ্ষ বনবিষয়া গৰাকীৰ গুৱাহাটীৰ জু ৰোডত থকা বাস ভৱনতো দূৰ্নিতি নিবাৰকে একে সময়তে তালাচী চলায় ৷ নিশা পৰ্যন্ত কেইবাঘণ্টাজুৰি চলা এই তালাচী অভিযানৰ সময়ত বনবিষয়া গৰাকী ডিফুত উপস্থিত নাছিল ৷
অভিযানকাৰী দলটোৱে বনবিষয়া গৰাকীৰ বাসভৱন আৰু কাৰ্যালয়ত তন্ন তন্নকৈ তালাচী চলাই কেইবীটাও ফাইল জব্দ কৰে ৷ দলটোৱে বনবিষয়া গৰাকীৰ চৰকাৰী বাসভৱনৰ পৰা কিছু পৰিমানৰ নগদ ধনো উদ্ধাৰ কৰা বুলি জানিব পৰা গৈছে ৷
উল্লেখ্য যে, অসম চৰকাৰৰ অন্যতম জ্যেষ্ঠ বনবিষয়া গৰাকীক ‘ হেড অৱ ফৰেষ্ট ফৰ্চ’ পদৰ পৰা বঞ্চিত কৰা হৈছিল ৷ কিন্তু ইয়াৰ বিৰুদ্ধে বিষয়া গৰাকীয়ে আদালতৰ দ্বাৰস্থ হোৱাত আদালতে শেহতীয়াভাবে বিষয়া গৰাকীৰ সপক্ষে ৰায়দান কৰিছিল ৷
এনে ঘটনা ক্ৰমৰ পিছ মুহূৰ্ততে বিষয়া গৰাকীৰ বিৰুদ্ধে চলা এই অভিযানৰ অন্তৰালত ৰহস্য লুকাই থকা বুলি বিভিন্ন পক্ষই সন্দেহ ব্যক্ত কৰিছে ৷ বাতৰি লিখা পৰলৈকে অভিযীন চলি আছিল ৷