নৱবৰ্ষৰ দ্বিতীয়টো দিনতে কাৰ্বি আংলঙত আৰক্ষীৰ বৃহৎ সফলতা। নিচাযুক্ত দ্ৰৱ্যৰ বিৰুদ্ধে চলোৱা অভিযানত এই সফলতা লাভ কৰে আৰক্ষীয়ে।
শুকুৰবাৰে পুৱা বোকাজান মহকুমাৰ অন্তৰ্গত খটখটী এছ বি আই নাকা তালাচীত খটখটী আৰক্ষীয়ে উদ্ধাৰ কৰে নিষিদ্ধ কানি। খটখটী আৰক্ষীৰ সূত্ৰৰ পৰা জানিব পৰা মতে, নাকা তালাচীৰ সময়ত ডিমাপুৰ দিশৰ পৰা বোকাজান দিশে গৈ থকা PB13-AR-9275 পঞ্জীয়ন নম্বৰৰ এখন ট্ৰাকত সন্দেহবশত তালাচী চলায়।
তালাচীৰ সময়ত ট্ৰাকখনৰ পৰা দুটা ক’লা প্লাষ্টিকৰ পেকেটৰ পৰা ২ কেজি ৭০ গ্ৰাম নিষিদ্ধ কানি খটখটী আৰক্ষীয়ে উদ্ধাৰ কৰে। এই কানিখিনি সৰবৰাহৰ অভিযোগত খটখটী আৰক্ষীয়ে দুজন লোকক আটক কৰে। তেওঁলোক হৈছে ক্ৰমে পঞ্জাবৰ লুধিয়ানাৰ ভুট্টা দেলহনৰ ভজন সিঙৰ পুত্ৰ শিৰ্মজিত সিং আৰু মেজৰ সিঙৰ পুত্ৰ বালবিন্দৰ সিং। দুয়োকে আটক কৰি আৰক্ষীয়ে তদন্ত অব্যাহত ৰাখিছে।
উল্লেখ্য যে খটখটী থানাৰ ভাৰপ্ৰাপ্ত আৰক্ষী বিষয়া সূৰ্য কুমাৰ বৰাৰ নেতৃত্বত উপ-পৰিদৰ্শক দেৱাশীস বৰা, গোবিন কাকতি আৰু থানাৰ কনিষ্টবলৰ সহযোগত এই নাকা তালাচী চলোৱা হৈছিল। পৰৱৰ্তী সময়ত খটখটী আৰক্ষীয়ে বোকাজান মহকুমা আৰক্ষী বিষয়া ৰুস্তম ৰাজ ব্ৰহ্ম আৰু নিৰপেক্ষ সাক্ষীৰ সাক্ষাতত কানিখিনি জব্দ কৰে।
