মুখ্যমন্ত্ৰী মহিলা উদ্যমিতা অভিযানৰ অধীনত মঙলবাৰে বোকাজান বিধানসভা সমষ্টি (Bokajan Legislative Assembly Constituency)ত মুখ্যমন্ত্ৰী হিমন্ত বিশ্ব শৰ্মাই (Himanta Biswa Sarma) প্ৰদান কৰে ১০ হাজাৰ টকাকৈ চেক (Issues a cheque)। সৰিয়হজান সাংজাংলাংছ’ ষ্টেডিয়াম খেলপথাৰত আয়োজিত অনুষ্ঠানত সমষ্টিটোৰ মুঠ ১৭,৩৯৮ গৰাকী আত্মসহায়ক গোট (Self-Help Group)ৰ মহিলাৰ মাজত এই পুঁজি বিতৰণ কৰা হয়।
আনহাতে, এই সভাতেই প্রায় ২০ কোটি টকাৰে খটখটিত নিৰ্মাণ কৰা এটা ষ্টেডিয়াম, বালিপথাৰ, বৰপথাৰ, চিলনীজান আৰু হিদীপিত নিৰ্মান কৰি উলিওৱা ৪টা বজাৰ গৃহৰ মুখ্যমন্ত্ৰীয়ে ভাৰ্চুৱেলী শুভ উদ্বোধন (Market house inauguration) কৰে। দিনৰ ১১.৩০ বজাত অনুষ্ঠিত অনুষ্ঠানত মুখ্যমন্ত্ৰীৰ সৈতে উপস্থিত থাকে কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী তুলিৰাম ৰংহাং, সাংসদ অমৰ সিং তিছ’, বিধানসভাৰ উপাধ্যক্ষ তথা বোকাজান বিধানসভা সমষ্টিৰ বিধায়ক ডঃ নোমল মমিন, অভিভাৱক মন্ত্ৰী নন্দিতা গাৰলোচা আৰু পৰিষদৰ কাৰ্যবাহী সদস্যসকলৰ লগতে কাৰ্বিআংলং জিলা উপায়ুক্ত।
ভাষণ প্ৰসংগত মুখ্যমন্ত্ৰীয়ে কয় যে, বোকাজান বিধানসভা সমষ্টিত ১১৫ সংখ্যক মুখ্যমন্ত্ৰী মহিলা উদ্যমিতা অভিযানৰ চেক বিতৰণ অনুষ্ঠান অনুষ্ঠিত হৈছে। আনহাতে, অসমৰ ১২৬ টা বিধানসভা সমষ্টিৰ ভিতৰত আজি যোৰহাটৰ মৰিয়নীতো এই অভিযানৰ পুঁজি প্ৰদান কৰা হ’ব আৰু ইয়াকে লৈ ১২৬ টা বিধানসভা সমষ্টিত এই কাৰ্যসূচী সম্পন্ন হ’ব। আনহাতে, এই আঁচনিৰ অধীনত বৰ্তমানলৈকে ৰাজ্যৰ ২৮,৬১,২৪০ গৰাকী মহিলা উপকৃত হৈছে। অনাগত দিনত ৪ লাখ মহিলাই এই পুঁজি লাভ কৰিব।
আনহাতে, পৰৱৰ্তী সময়ত ১.৫ লাখ মহিলাক এই পুঁজি প্ৰদান কৰাৰ কথাও মুখ্যমন্ত্ৰীয়ে ঘোষণা কৰে। তেওঁ লগতে কয় যে এতিয়ালৈকে অসমৰ মহিলা আত্মসহায়ক গোটত ৪০ লাখ মহিলা জড়িত হৈ আছে আৰু ইয়াৰে ভিতৰত ৮ লাখ মহিলা ইতিমধ্যে লাখপতি বাইদেউ হৈছে আৰু ৪ লাখ মহিলা লাখপতি বাইদেউ হোৱাৰ পথত। লগতে বোকাজান সমষ্টিত ৬৮০ গৰাকী লাখপতি বাইদেউ থকা বুলিও তেওঁ উল্লেখ কৰে। নিজৰ ভাষণ প্ৰসংগত মুখ্যমন্ত্ৰীয়ে বোকাজানত ৩৫০ কোটি টকাৰে এখন সৈনিক স্কুল স্থাপন কৰাৰো প্ৰতিশ্ৰুতি দিয়ে।
আনহাতে, সভাৰ অন্তত সাংবাদিকে সোধা প্ৰশ্নৰ উত্তৰত মুখ্যমন্ত্ৰীয়ে কয় যে এতিয়ালৈকে বোকাজানত প্ৰাৰ্থী নিৰ্ণয় কৰা হোৱা নাই। লগতে তেওঁ অহা ১৬ মাৰ্চৰ ভিতৰত এন ডি এ মিত্ৰদলৰ প্ৰাৰ্থীৰ তালিকা প্ৰকাশ হ’ব পাৰে বুলি উল্লেখ কৰে। আনহাতে, কাৰ্বি আংলং জিলাৰ ৫ টা বিধানসভা সমষ্টিৰ দুই-তিনিটা সমষ্টিত নতুন মুখ আহিব পাৰে বুলিও মুখ্যমন্ত্ৰীয়ে এক কৌশলী উত্তৰ দিয়ে। ইফালে কাৰ্বি আংলং জিলাত বিৰোধী এ পি এইছ চি এল দলে শাসকীয় দলৰ কোনো ক্ষতি কৰিব নোৱাৰে বুলি দৃঢ়তাৰে কয়।
