১১ মাৰ্চ, ২০২৬ বুধবাৰৰ দিনটো অসমৰ পাহাৰীয়া জিলা কাৰ্বি আংলঙ (Karbi Anglong)ৰ ইতিহাসৰ বাবে এক উল্লেখযোগ্য দিন হিচাপে লিপিবদ্ধ হৈ থাকিব। কিয়নো এই দিনটোতে কাৰ্বি আংলং জিলাৰ বিকাশ আৰু উন্নয়নৰ ক্ষেত্ৰত ২ কোটিৰো অধিক প্ৰকল্প মুকলি তথা শুভাৰম্ভ (Project inauguration) কৰে মুখ্যমন্ত্ৰী ডঃ হিমন্ত বিশ্ব শৰ্মা (Himanta Biswa Sarma)ই। বুধবাৰে সৰ্বমুঠ ২,১০৯ কোটি টকা ব্যয়সাপেক্ষে কাৰ্বি আংলঙত অৰ্ধশতাধিক প্ৰকল্পৰ উদ্বোধন আৰু আন অৰ্ধশতাধিক প্ৰকল্পৰ শিলান্যাস কৰা হয়।
আজি মুখ্যমন্ত্ৰীয়ে মুকলি কৰা প্ৰকল্পসমূহৰ ভিতৰত আছে পশ্চিম কাৰ্বি আংলঙৰ চৰকাৰী আদর্শ স্নাতক মহাবিদ্যালয়, ডিফু টাউন লেক, কাৰ্বি আংলং ক্রীড়া সংস্থাৰ বিলাংভেক জলক্রীড়া ক্ষেত্রকে ধৰি মুঠ ৫৪টা প্ৰকল্প।
ইয়াৰ উপৰি সৈনিক স্কুল লংভকু, বংলং তেৰাঙৰ ৪২ মেগাৱাট সৌৰশক্তি প্রকল্প, ডিফুৰ হোটেল আৰু পর্যটন ব্যৱস্থাপনা প্রতিষ্ঠানৰ উপৰি পথ-দলং আদি মিলাই মুঠ ৫৩টা প্ৰকল্পৰ নিৰ্মাণকাৰ্যৰ শুভাৰম্ভ কৰে মুখ্যমন্ত্ৰী ডঃ হিমন্ত বিশ্ব শৰ্মাই।
আনহাতে, কাৰ্বি আংলঙত মুকলি কৰা প্ৰকল্পসমূহৰ ভিতৰত অন্যতম এটা হৈছে ডিফু কৰ্কট কেন্দ্ৰ। স্বাস্থ্য সেৱা ব্যৱস্থাৰ অধিক উন্নত কৰাৰ লক্ষ্যৰে মুখ্যমন্ত্ৰীয়ে অত্যাধুনিক ডিফু কৰ্কট কেন্দ্ৰটো ডিফুৰ জনসাধাৰণৰ বাবে উছৰ্গা কৰে। ২৭০ কোটি টকা ব্যয়েৰে নিৰ্মাণ কৰা এই কেন্দ্ৰৰ জৰিয়তে ৰোগীসকলে কৰ্কট ৰোগৰ বিশেষ চিকিৎসা লাভ কৰিব।
আজি উদ্বোধন কৰা আন এক গুৰুত্বপূৰ্ণ প্ৰকল্প হৈছে ২২৮ কোটি টকা ব্যয়সাপেক্ষে ডিফুত নিৰ্মাণ কৰা চাৰিলেনযুক্ত খৰছিং তেৰাং ইংজাৰকাপ ফ্লাইঅ’ভাৰ। এই বৃহৎ আন্তঃগাঁথনিমূলক প্ৰকল্পৰ জৰিয়তে ডিফু চহৰত যান-বাহনৰ চলাচল সুচল হোৱাৰ লগতে যান-জঁট হ্ৰাস হ’ব আৰু চহৰখনৰ যোগাযোগ ব্যৱস্থা যথেষ্ট উন্নত হ’ব বুলি আশা কৰা হৈছে।
