কাৰ্বি আংলং জিলাৰ খটখটী আৰক্ষীৰ অভিযানত বৃহৎ সাফল্য। খটখটী আৰক্ষীৰ অভিযানত উদ্ধাৰ হৈছে প্ৰায় ৬ কেজি ওজনৰ নিষিদ্ধ মাদকদ্ৰৱ্য। এই দ্ৰব্য সৰবৰাহৰ অভিযোগত আটক কৰা হৈছে দুজন ব্যক্তিক। মঙলবাৰে সন্ধিয়া খটখটী এছ বি আইত আৰক্ষীৰ নিয়মীয়া নাকা তালাচীৰ সময়ত এখন ট্ৰেইলাৰৰ পৰা উদ্ধাৰ কৰা হয় নিষিদ্ধ পপিষ্ট্ৰ’সহ। লগতে ট্ৰেইলাৰখনত অহা দুজন লোকক আটক কৰা হয়।
আৰক্ষীৰ সূত্ৰে জানিব পৰা মতে, নিয়মীয়া নাকা তালাচীৰ সময়ত মণিপুৰ দিশৰ পৰা বোকাজানৰ দিশে গৈ থকা অৱস্থাত PB- 03 -AT-3866 পঞ্জীয়ন নম্বৰৰ এখন ট্ৰেইলাৰৰ কেবিনৰ পিছফালৰ বডি বস্কত লুকৱাই অনা পপিষ্ট্ৰ’খিনি উদ্ধাৰ কৰা হয়। মুঠ ১১ পেকেট প্লাষ্টিকৰ পেকেটৰ পৰা ৫ কেজি ৮১৫ গ্ৰাম নিষিদ্ধ পপিষ্ট্ৰ’ খটখটী আৰক্ষীয়ে উদ্ধাৰ কৰে।
আনহাতে, খটখটী আৰক্ষীয়ে আটক কৰা ব্যক্তি দুজন হৈছে ক্ৰমে প্ৰয়াত মলকিত সিঙৰ পুত্ৰ লুখৱিন্দৰ সিং (৪০), ঠিকনা : ডাংগিয়ান, থানা : জগ্ৰাঁও,জিলা : লুধিয়ানা, পঞ্জাব আৰু
প্ৰয়াত গুৰমেইল সিঙৰ পুত্ৰ পৰমিন্দৰ সিং (৩৫), ঠিকনা : গাঁও : চুঘা খুৰ্দ, থানা : সদৰ আৰক্ষী থানা, মোগা, জিলা : মোগা, পঞ্জাব।
দুয়োকে আটক কৰি আৰক্ষীয়ে তদন্ত অব্যাহত ৰাখিছে বুলি জানিব পৰা গৈছে।
উল্লেখযোগ্য যে খটখটী থানাৰ ভাৰপ্ৰাপ্ত আৰক্ষী বিষয়া সূৰ্য কুমাৰ বৰা, উপ-পৰিদৰ্শক দেৱশীষ বৰা, জীৱন শইকীয়া আৰু থানাৰ ষ্টাফৰ সহযোগত এই নাকা তালাচী চলিছিল।
