অনুপ্ৰৱেশ (অসমৰ পৰা বহিষ্কাৰ) আইন, ১৯৫০ৰ ধাৰা ২ অনুযায়ী প্রদান কৰা ক্ষমতা প্রয়োগ কৰি ৰাজ্য চৰকাৰে কার্বি আংলং জিলাৰ বিদেশী ন্যায়াধীকৰণ কৰ্তৃপক্ষই ঘোষণা কৰা তিনিজন বিদেশীক বহিষ্কাৰৰ নিৰ্দেশ জাৰি কৰিছে।
বহিষ্কাৰৰ জাননী লাভ কৰা ব্যক্তিকেইজন হৈছে বোকাজান থানাৰ অধীনস্থ যাদৱ ৰায় গ্রাণ্ট অঞ্চলৰ বাসিন্দা মোঃ ফকৰুদ্দিন, মাঞ্জা থানাৰ অধীনস্থ হিদিম তেৰণ বস্ৰর বাসিন্দা মোঃ ৰফিকুল আলী আৰু মাঞ্জা থানাৰ অধীনস্থ মাঞ্জা নদীপাৰ অঞ্চলৰ বাসিন্দা মোঃ ফাইজুল হক।
বিদেশী ন্যায়াধীকৰণে কার্বি আংলঙত যথাবিহিত বিচাৰ প্রক্রিয়াৰ অন্তত পৃথক পৃথক গোচৰত তেওঁলোকক বিদেশী হিচাবে ঘোষণা কৰে। সংশ্লিষ্ট ন্যায়াধীকৰণৰ মতামত যথাক্রমে ২৩ ডিচেম্বৰ ২০২৫, ৬ ডিচেম্বৰ ২০২৫ আৰু ২৪ ডিচেম্বৰ ২০২৫ তাৰিখে প্রদান কৰা হয়।
ঘোষিত বিদেশী হিচাবে তেওঁলোকৰ উপস্থিতি জনস্বার্থ আৰু ৰাজ্যৰ অভ্যন্তৰীণ নিৰাপত্তাৰ পৰিপন্থী বুলি উল্লেখ কৰি সংশ্লিষ্ট কর্তৃপক্ষই আদেশ জাৰি কৰি নির্দেশ দিয়ে যে এই আদেশ লাভ কৰাৰ ২৪ ঘণ্টাৰ ভিতৰত তেওঁলোকে অসম তথা ভাৰতীয় ভূখণ্ড ত্যাগ কৰিব লাগিব।
নির্দেশ অনুযায়ী তেওঁলোকে ধুবুৰী/শ্রীভূমি/দক্ষিণ শালমাৰা–মানকাছৰ পথ ব্যৱহাৰ কৰি দেশ ত্যাগ কৰিব লাগিব।নির্ধাৰিত সময়সীমাৰ ভিতৰত এই আদেশ পালনত ব্যর্থ হ’লে অনুপ্ৰৱেশ (অসমৰ পৰা বহিষ্কাৰ) আইন, ১৯৫০ৰ বিধান অনুযায়ী চৰকাৰে প্রয়োজনীয় ব্যবস্থা গ্রহণ কৰিবলৈ বাধ্য হ’ব। এই আদেশ অসম চৰকাৰৰ কর্তৃত্বশীল বিষয়াই জাৰি কৰিছে।
