নিউজ ডেস্কঃ
মৃত ব্যক্তিৰ নামত নাগৰিকত্বৰ প্রমাণ বিচাৰি জাননী পঠালে বিদেশী ন্যায়াধীকৰণে! কাছাৰ জিলাত সংঘটিত এই ঘটনাত স্তম্ভিত হৈ পৰিছে উদাৰবন্দৰ শ্যামাচৰণ দাসৰ পৰিয়াল৷ অৱশ্যে তেওঁৰ কন্যা বেবী দাসে জনাইছে, আইনত আপত্তি নাথাকিলে তেওঁলোকে মৃতকৰ প্রতিনিধি হিচাবে এই গোচৰ যুঁজিব বিচাৰে৷
উল্লেখ্য, ২০১৬ চনতে মৃত্যু হৈছে শ্যামাচৰণৰ৷ বিদেশী ন্যায়াধীকৰণো সেই সম্পর্কে অৱগত৷ কাৰণ সেই একেই ট্রাইবুনালত পূৰ্বৰে পৰাই তেওঁৰ বিৰুদ্ধে গোচৰ চলিছিল৷ তেওঁক তেতিয়া সন্দেহযুক্ত ভোটাৰ হিচাবে চিনাক্ত কৰা হৈছিল৷ প্রায় সকলো ধৰণৰ নাগৰিক সুবিধাৰ পৰা বঞ্চিত সমগ্ৰ পৰিয়ালটো৷ মৃত্যুৰ পিছত ট্রাইবুনালে গোচৰটো খাৰিজ কৰে৷
তদানীন্তন ন্যায়াধীশে ৰায় দিছিল, প্রদত্ত নথিপত্রত অভিযুক্তৰ মৃত্যুৰ প্রমাণ পোৱা গৈছে৷ ফলত এই গোচৰ চলোৱাৰ আৰু যুক্তি থাকিব নোৱাৰে৷ ছয় বছৰ পিছত সেই একেই ট্রাইবুনালৰ বর্তমান সদস্যই শ্যামাচৰণৰ ঘৰলৈ জাননী পঠাইছে৷ অহা ৩০ মার্চৰ ভিতৰত তেওঁক ট্রাইবুনালত গৈ ভাৰতীয় নাগৰিকত্বৰ প্রমাণ দিবলৈ কোৱা হৈছে।
উক্ত জাননী লাভ কৰি এতিয়া হতভম্ব পৰিয়ালৰ বাকী সদস্যসকল৷ তেওঁৰ বিধৱা পত্নী সুলেখা দাসে কয়, ‘‘অসহায় অৱস্থা আৰু বাঢ়ি গ’ল৷’’ তেওঁলৈও আৰক্ষীয়ে সন্দেহযুক্ত হিচাবে জাননী পঠাইছিল৷ একপক্ষীয় ৰায়ত ট্রাইবুনালে তেওঁক বিদেশী বুলি ঘোষণা কৰে৷ পিছত আৰক্ষীয়ে এদিন ঘৰৰ পৰা তেওঁক উঠাই নি শিলচৰ চেণ্ট্ৰেল জে’লত ভৰাই থয়৷ কৰোনা পৰিস্থিতিৰ বাবে ছুপ্রিম কোর্টৰ নির্দেশত ডেৰ বছৰ পিছত জামিনত মুক্তি পায় সুলেখাই৷
