আইপিএলত (IPL) ইয়াৰ পূৰ্বে প্ৰতিপক্ষই মুম্বাই ইণ্ডিয়ানছৰ বিৰুদ্ধে ১৬ অভাৰহে গণনা কৰিছিল। কিয়নো সকলোৱে জানিছিল যে যশপ্ৰীত বুমৰাহৰ (Yashpreet Bumrah) চাৰি অভাৰ কিবা প্ৰকাৰে অতিবাহিত কৰিব লাগিব। তেওঁৰ সেই নিৰ্দিষ্ট চাৰি অভাৰত যিয়ে ৰাণ নাহক কিয় সেয়া আছিল বোনাছ। কিন্তু এইবাৰৰ আইপিএলত ছবিখন সলনি হৈছে। বুমৰাহৰ কেৰিয়াৰত ইমান বেয়া সময় চাগে কেতিয়াও দেখা নাই। বেটছমেনে চকু মুদি তেওঁৰ বলত ডাঙৰ ডাঙৰ শ্বট মাৰি আছে। তেনে ক্ষেত্ৰত প্ৰশ্ন উত্থাপন হৈছে, বিশ্বৰ এগৰাকী শ্ৰেষ্ঠ পেচাৰে এইবাৰ দলৰ পৰা বাহিৰত থাকিব লাগিব নেকি।
বুধবাৰে ছানৰাইজাৰ্ছ হায়দৰাবাদৰ বিৰুদ্ধে বুমৰাহে ৪ অভাৰত ৫২ ৰাণ খৰচ কৰে। কিন্তু এটাও উইকেট লাভ কৰিবলৈ সক্ষম নহ’ল। তেওঁৰ বিৰুদ্ধে অভিষেক শৰ্মাৰ পূৰ্বৰ অভিলেখ ভাল নাছিল। বিগত পাঁচখন মেচত বুমৰাহে অভিষেকক দুবাৰকৈ আউট কৰিছে। অভিষেকে তেওঁৰ বিৰুদ্ধে ৭৫ ষ্ট্ৰাইক ৰেটত মাত্ৰ ১৭ ৰাণ সংগ্ৰহ কৰে। কিন্তু বুধবাৰে অভিষেকে মিড-অনত বুমৰাহৰ ধীৰ গতিৰ বলটো বাউণ্ডেৰীৰ বাহিৰলৈ উৰুৱাই দিয়ে। ইয়াৰ পিছতে ট্ৰেভিছ হেডে বুমৰাহৰ মূৰৰ ওপৰেৰে ৯৯ মিটাৰ দীঘল ছয় কোবায়। পাৱাৰ প্লে’ত বুমৰাহে দুটা অভাৰত ৩২ ৰাণ খৰচ কৰে। আইপিএলত পাৱাৰ প্লে’ত ইমান ৰাণ তেওঁ আগতে কেতিয়াও দিয়া নাছিল। পাৱাৰ প্লে’ৰ পিছতো একেই ছবি। হেনৰিখ ক্লাচেনে বুমৰাহৰ বলত ছিক্সাৰ কোবায়। ইয়াৰ পিছতে আহি মুম্বাই অনুৰাগীৰ বাবে আটাইতকৈ বেদনাদায়ক মুহূৰ্ত। ঘৰুৱা ক্ৰিকেটাৰ সলীল অৰোৰায়ো মিড-অফত বুমৰাহক ছয় কোবায়। বুধবাৰৰ মেচখনত বুমৰাহৰ বলত ৫টা ছয় কোবায়। এই ছবিখন অতি বিৰল।
এইবাৰৰ আইপিএলত বুমৰাহে ৮ খন মেচত ৩০ অভাৰ বলিং কৰি ২৬৪ ৰাণ খৰচ কৰিছে। অৰ্থাৎ প্ৰতি অভাৰত ৮.৮০ ৰাণ। টি-২০ কেৰিয়াৰত বুমৰাহৰ ইকনমি ৰেট (৭.৩৩)তকৈ ই বহু বেছি। বুমৰাহৰ কেৰিয়াৰৰ বলিং গড় ২৩.২১। এইবাৰ আইপিএলত তেওঁ মাত্ৰ ২টা উইকেটহে দখল কৰিছে। তেওঁৰ বলিঙৰ গড় ১৩২। আইপিএলত বুমৰাহৰ গড় বলৰ গতি ১৩২.১ কিলোমিটাৰলৈ হ্ৰাস পাইছে।
ইফালে বুমৰাহৰ বলিং বিশ্লেষণ কৰি ৰবিচন্দ্ৰন অশ্বিনে কয়, মুম্বাইৰ এই পেচাৰগৰাকীয়ে উইকেট ল’বলৈ চেষ্টা কৰিও সমস্যাৰ সন্মুখীন হৈছে। অশ্বিনে কয়, “বুমৰাহৰ প্ৰকৃত শক্তি হ’ল ইয়ৰ্কাৰ বল কৰা আৰু বেটছমেনক আঁতৰাই ৰখা। যদি ৰাণ নাহে তেন্তে বেটছমেনে ৰিস্ক লয় আৰু উইকেট দিয়ে। ৱাংখেড়েৰ দৰে খেলপথাৰত সেয়া অধিক গুৰুত্বপূৰ্ণ। কিন্তু এইবাৰ বুমৰাহে অত্যধিক চেষ্টা কৰিছে। সেইটোৱেই সমস্যা।”
আনহাতে, ইৰফান পাঠানৰ মতে, বুমৰাহে বল বেছি লেহেমীয়া কৰি ভুল কৰিছে। ইৰফানে কয়, “এইবাৰ বুমৰাহৰ ৪৪ শতাংশ বলৰ গতি লেহেমীয়া হৈছে। অৰ্থাৎ প্ৰতি দুটা বলত এটাকৈ শ্ল’ বল। তেওঁৰ ফৰ্মত কোনো সমস্যা নাই। কিন্তু তেওঁৰ গড় গতি ঘণ্টাত ১৩০ কিলোমিটাৰলৈ নামি আহিছে। তেওঁ বেছি বেগেৰে বলিং কৰা হ’লে তেওঁ ভাল ফল পালেহেঁতেন। বুমৰাহৰ দৰে বলাৰক শিকাবলগা একো নাই। কিন্তু তেওঁ এই পৰিসংখ্যাবোৰ মনত ৰাখিব লাগিব।”
এনে পৰিস্থিতিত মুম্বাইৰ সহকাৰী প্ৰশিক্ষক কিৰণ পোলাৰ্ডে বুমৰাহক ৰিজাৰ্ভ বেঞ্চত বহাব পাৰে বুলি ইংগিত দিছে। তেওঁ কয়, “আমি চাব লাগিব যে বুমৰাহে কিয় ভাল বলিং কৰা নাই। বছৰ বছৰ ধৰি তেওঁ এই কাম কৰি আহিছে। তেৱোঁ মানুহ। গতিকে তেওঁ ভুল কৰিব পাৰে। দুখন মেচ বা এটা ছিজন বেয়া হ’ব পাৰে। প্ৰতিজন ক্ৰিকেটাৰক এই সময়ত সময়, জিৰণি আৰু বিৰতিৰ প্ৰয়োজন। বছৰ বছৰ ধৰি তেওঁ মুম্বাই আৰু ভাৰতৰ হৈ কি কৰিছে সেই কথা আমি মনত ৰাখিব লাগিব।” পোলাৰ্ডৰ কথাৰ পৰা যেন উমান পোৱা গৈছে যে বুমৰাহ হয়তো কেইখনমান মেচৰ বাবে দলত নাথাকিব পাৰে। তাৰ পিছত হয়তো তেওঁ পুৰণি আত্মবিশ্বাস ঘূৰাই পাব। মুম্বাই ইণ্ডিয়ানছেও তাৰেই আশা কৰিছে।
