গণৰাজ্য দিৱস আৰু স্বাধীনতা দিৱসৰ পূৰ্বে নিয়মীয়াকৈ ভাৰতবিৰোধী অভিযান আৰম্ভ কৰাৰ লগতে বিদেশত ভাৰতীয় কূটনৈতিক মিছনৰ বিৰুদ্ধে বিভিন্ন কাৰ্যসূচী আৰু ভাবুকি দিয়াৰ অভিযোগ উত্থাপন হৈ আহিছে খালিস্তানী সংগঠনৰ বিৰুদ্ধে। পলাতক খালিস্তানী সন্ত্ৰাসবাদী গুৰুপতৱন্ত সিং পান্নুনৰ সংগঠন ‘শিখছ ফৰ জাষ্টিচ’ চমুকৈ এছ এফ জেৰ এইবাৰ ৰাজধানী দিল্লীত ব্ৰিকছ সন্মিলনৰ বিৰুদ্ধে অভিযান।
শনিবাৰে ৰাজধানী দিল্লী আৰু হাৰিয়ানাৰ শোণিপত জিলাৰ সিংহু সীমান্তত সমবেত হৈ পান্নুনৰ অনুগামীসকলে ব্ৰিকছবিৰোধী আৰু ভাৰতবিৰোধী শ্লোগান উত্থাপন কৰে। ভাৰতবিৰোধী বিভিন্ন শ্লোগান লিখা পোষ্টাৰো দেখা যায়। এই তথ্যক লৈ দিল্লী আৰক্ষীয়ে অভিযান আৰম্ভ কৰি তিনিজন লোকক গ্ৰেপ্তাৰ কৰে। এই ঘটনাৰ তদন্ত কৰা দিল্লী আৰক্ষীৰ বিশেষ কোষে ভিডিঅ’ ফুটেজৰ সহায়ত অভিযুক্তক চিনাক্ত কৰে বুলি সংবাদ সংস্থা এএনআয়ে প্ৰকাশ কৰিছে।
এই ঘটনাৰ দায়িত্ব স্বীকাৰ কৰি শনিবাৰে ছ’চিয়েল মিডিয়াত এছ এফ জেৰ মুৰব্বী পান্নুনে পোষ্ট কৰে। তেওঁ লগতে দাবী কৰে যে ৬ ছেপ্টেম্বৰত সিংঘু সীমান্তৰ দেৱালত বিতৰ্কিত গ্ৰেফিটি অংকন কৰা হৈছিল। উল্লেখ্য যে কানাডাত আশ্ৰয় লোৱা খালিস্তানী নেতাজনে ২০২২ চনত দেশখনত বসবাস কৰা হিন্দুসকলৰ ওপৰত আক্ৰমণৰ সকীয়নি দিছিল। ইয়াৰ পিছত নিয়াই চণ্ডীগড়ত থকা তেওঁৰ ঘৰ আৰু অমৃতসৰৰ মাটি জব্দ কৰে। পঞ্জাবত পান্নুনৰ বিৰুদ্ধে ২২টা অপৰাধমূলক গোচৰ ৰুজু হয়। ইয়াৰে তিনিটা দেশদ্ৰোহৰ বাবে। কানাডা, আমেৰিকা আৰু ব্ৰিটেইনত থকা ভাৰতীয় দূতাবাসত আক্ৰমণৰ অভিযোগ এছ এফ জেৰ বিৰুদ্ধে।
