ওড়িশাৰ বালাছ’ৰৰ অৰণ্যৰ পৰা পাঁচটা ওৰাংওটাং উদ্ধাৰ ঘটনাত আহিছে এক নতুন টুইষ্ট। ওড়িশা আৰক্ষীয়ে তদন্ত কৰি থকা অৱস্থাত পশ্চিমবংগৰ পূব মেদিনীপুৰ জিলাৰ দীঘাৰ পৰা তিনিজন লোকক গ্ৰেপ্তাৰ কৰিছে। তেওঁলোকক সোধা-পোছা কৰা হৈছে । এই কামত ওড়িশা আৰক্ষীৰ বিশেষ টাস্ক ফ’ৰ্চক পূব মেদিনীপুৰ জিলা আৰক্ষীয়ে সহযোগিতা আগবঢ়াইছে।
যোৱা মঙলবাৰে বালাছ’ৰৰ ভোগৰাই অঞ্চলৰ বাৰাপাই গাঁৱৰ গাতে লাগি থকা বনাঞ্চলৰ পৰা উদ্ধাৰ কৰা হয় ওৰাংওটাংকেইটা। ভাৰতত এই প্ৰাণীবোৰ বিৰল। ওৰাংওটাং প্ৰধানকৈ ইণ্ডোনেছিয়া আৰু মালয়েছিয়াৰ অৰণ্যত বাস কৰে। বৰ্তমান জলবায়ু পৰিৱৰ্তন আৰু চোৰাং চিকাৰীৰ বাবে ইহঁতৰ সংখ্যা হ্ৰাস পাইছে। এতিয়া কেৱল বৰ্নিও আৰু সুমাত্ৰাৰ অৰণ্যতহে ওৰাংওটাং পোৱা যায়। অনুমান কৰা হৈছে যে এই পাঁচটা ওৰাংওটাং তাৰ পৰাই চোৰাং সৰবৰাহকাৰীৰ হাতত পৰি ওড়িশাৰ অৰণ্যত উপস্থিত হৈছিল।
কাৰণ মানুহৰ হস্তক্ষেপ অবিহনে সেয়া সম্ভৱ নহয়। বালাছ’ৰৰ বনাঞ্চলৰ আশে-পাশে থকা অঞ্চলৰ চিচিটিভি ফুটেজ পৰীক্ষা কৰি এখন ক’লা ৰঙৰ গাড়ী চিনাক্ত কৰিছে আৰক্ষীয়ে। ওৰাংওটাং উদ্ধাৰৰ আগদিনা নিশা গাড়ীখন অৰণ্যৰ ফালে গৈছিল। ১৫ মিনিট পিছত আকৌ গুচি যায়। বাহনখনৰ সূত্ৰৰ আঁত ধৰি ওড়িশা আৰক্ষীয়ে দীঘা গৈ পায়। সূত্ৰৰ পৰা জানিব পৰা মতে, ওড়িশা এছটিএফৰ সদস্যসকলে এখন নিৰ্দিষ্ট বাহনৰ সন্ধানত দীঘালৈ গৈছিল। নতুন দীঘাৰ কিছুমান হোটেল পৰিদৰ্শন কৰে। চিচিটিভিৰ ফুটেজ পৰীক্ষা কৰি হোটেল কৰ্তৃপক্ষৰ সৈতে কথা পাতি এখন হোটেলৰ পৰা তিনিজন লোকক গ্ৰেপ্তাৰ কৰা হয়। অৱশ্যে তদন্তৰ স্বাৰ্থত তেওঁলোকৰ নাম আৰু পৰিচয় প্ৰকাশ কৰা হোৱা নাই।
তদন্তকাৰীয়ে তেওঁলোকক সোধা-পোছা কৰি ওৰাংওটাং সৰবৰাহৰ চক্ৰৰ শিপাৰ ওচৰলৈ যাবলৈ চেষ্টা কৰিছে। ওড়িশা আৰক্ষীৰ ভাৰপ্ৰাপ্ত ডিজি বিনয় তোছ মিশ্ৰই সংবাদ সংস্থা পিটিআইক জনোৱা মতে, “ওড়িশা বন বিভাগৰ বন সংৰক্ষকৰ (পিচিচিএফ) আবেদনত অপৰাধ দমন শাখাৰ বিশেষ টাস্ক ফ’ৰ্চে শুকুৰবাৰে এটা গোচৰ ৰুজু কৰে। এছটিএফৰ এটা বন্যপ্ৰাণী শাখা আছে। তেওঁলোকে এনে কাণ্ডৰ ওপৰত চকু ৰাখে। তদন্ত আৰম্ভ কৰা হৈছে।” বিনয়ে লগতে কয় যে ওড়িশা আৰক্ষীৰ এই নিৰ্দিষ্ট শাখাটোৰ বন্যপ্ৰাণী সৰবৰাহৰ সৈতে জড়িত গোচৰত ১০০ শতাংশ সফলতাৰ অভিলেখ আছে। পূব মেদিনীপুৰৰ আৰক্ষী অধীক্ষক অংশুমান সাহাই কয় যে ওড়িশাৰ তদন্তকাৰীক সকলো ধৰণৰ সাহায্য প্রদান কৰা হৈছে৷
