[captainform id=”1286858″ lightbox=”1″ miliseconds=”1000″ type=”auto-popup”]
ASSAM TIMES POST
ডিফুঃ অভি-নীল কাণ্ডৰ গোচৰত প্ৰতিপক্ষৰ দুই উকীলৰ বিৰুদ্ধে ফৰিয়াদীয়ে দাখিল কৰা গোচৰ সন্দৰ্ভত প্ৰতিক্ৰিয়া প্ৰকাশ কৰিছে কাৰ্বি আংলঙৰ একাধিক জাতীয় সংগঠনে৷ ২০১৮ চনৰ ডকমকাৰ পাণজুৰি গাঁৱৰ কাংঠিলাংছ’ৰ মনোৰম পৰিবেশ উপভোগ কৰিবলৈ গৈ দুই উদীয়মান যুৱক অভিজিত আৰু নীলোৎপলে এদল উন্মাদ লোকৰ হিংসাৰ বলিহৈ অকালতে প্ৰাণ হেৰুৱাইছিল৷
এইলৈ নগাঁও ন্যায়িক আদালতত গোচৰ চলি আছে যদিও শেহতীয়াকৈ গোচৰৰ সাক্ষীক ভাবুকি প্ৰদান কৰাকলৈ আচামী পক্ষৰ দুই উকীল ক্ৰমে, আৰকই ইংতি কাথাৰ আৰু ছাৰলংকি কাথাৰৰ বিৰুদ্ধে গোচৰীয়া পক্ষ তথা নিহতদ্বয়ৰ দুই পিতৃয়ে এজাহাৰ দাখিল কৰিছে৷ ইয়াৰ পৰিপ্ৰেক্ষিতত ডিফুৰ কেএছএৰ কাৰ্যালয়ত জাকাছকে ধৰি এঘাৰটাকৈ সংগঠনে সোমবাৰে সংবাদমেলৰ আয়োজন কৰি গোচৰ সন্দৰ্ভত নিজা প্ৰতিক্ৰিয়া প্ৰকাশ কৰে৷
ফৰিয়াদী পক্ষই দাখিল কৰা এজাহাৰ উদ্দেশ্যপ্ৰণোদিত আৰু সাম্প্ৰদায়িক আৰু ভুৱা বুলি সংগঠনকেইটাৰ নেতৃবৰ্গই সংবাদমেলত অভিযোগ উত্থাপন কৰে৷ সংবাদমেলত সংগঠনকেইটাৰ নেতৃবৰ্গই কয় যে অভিযুক্ত লোকসকলৰ হৈ উকালতি কৰাটো অপৰাধ নেকি? জাকাছৰ অধ্যক্ষ খৰচিং টেৰণে পুত্ৰক হেৰুৱা দুই পিতৃৰ যন্ত্ৰণা উপলব্ধি কৰিবলৈ সক্ষম বুলি উল্লেখ কৰি অভি-নীলৰ পিতৃক প্ৰতিপক্ষৰ উকীলৰ বিৰুদ্ধে ৰুজু হোৱা গোচৰ প্ৰত্যাহাৰ কৰিবলৈ অনুৰোধ জনায়৷
গোচৰটোৰ আইনী প্ৰক্ৰিয়া চলি থকাৰ লগতে ইতিমধ্যে ৪৮ গৰাকীৰ বিৰুদ্ধে চাৰ্জশ্বীট দাখিল কৰাৰ লগতে গোচৰটো নগাঁও আদালতলৈ নিয়া হৈছে বুলি মন্তব্য কৰি নেতাগৰাকীয়ে দোষীক আইন অনুসৰি শাস্তি প্ৰদান আৰু নিৰ্দোষী লোকে যাতে হাৰাশাস্তি নাপায় তাৰ বাবে আহ্বান জনায়৷ সংবাদমেলখনত ক্ৰমে জাকাছ, এইছটিএল, কাৰ্বি আংলং ছাত্ৰ সন্থা, কেএনচিএ, কেএছৱাইচি, কেএফএ, এপিএইছএলচি, কেআৰএএ, কেএছইউ, কেএলএনএলএফ আৰু কেএইউপিএৰ নেতৃবৰ্গ উপস্থিত থাকে৷
