[captainform id=”1286858″ lightbox=”1″ miliseconds=”3000″ type=”auto-popup”]
ASSAM TIMES POST
ডিফুঃ অতিশয় নিৰ্দয় আৰু অমানৱীয় ভাবে যোৰহাটৰ টিয়কত কৰ্মৰত চিকিৎসক ডাঃ দেবেন দত্তক এদল উন্মাদ লোকে হত্যা কৰাৰ প্ৰতিবাদত পাহাৰীয়া জিলা কাৰবি আংলঙৰ সদৰ চহৰ ডিফু অসামৰিক চিকিৎসালয়তো চিকিৎসক সকলে মঙলবাৰ পুৱাৰ পৰা বুধবাৰ পুৱা ৬ বজালৈ ২৪ ঘণ্টীয়া কৰ্মবিৰতি পালন কৰে ৷
ডিফু অসামৰিক চিকিৎসালয়ৰ জৰুৰীকালীন অপিডিৰ বাহিৰে সকলো অ’পিডিৰ দৰ্জা বন্ধ হৈ থকা পৰিলক্ষিত হয় ৷ ৰোগী সকলে কেইবাঘণ্টাও অপেক্ষা কৰি বিনা চিকিৎসাই ঘৰমুৱা হ’ব লগীয়া হয় ৷
ইণ্ডিয়ান মেডিকেল এছ’চিয়েছন আৰু আছাম মেডিকেল ছাৰ্ভিচ সন্থাৰ আহ্বান মৰ্মে ডিফু চিকিৎসা মহাবিদ্যালয়ত কৰ্মবিৰতিত থকা চিকিৎসক সকলৰ আছাম মেডিকেল ছাৰ্ভিচ সন্থাৰ কাৰ্বি আংলং সমিতিৰ হৈ প্ৰাক্তন সভাপতি কে, ৰাজখোৱা আৰু বৰ্তমান সভাপতি হিতেশ টেৰণে ডাঃ দেবেন দত্তৰ হত্যাৰ ন্যায় বিচাৰ খুজি চৰকাৰক দাবী জনাই সংবাদ মাধ্যমৰ আগত ক্ষোভ উজাৰি কয় যে, আছাম মেডিকেল ছাৰ্ভিচ সন্থাই প্ৰতিটো বাৰ্ষিক অধিবেশনত চিকিৎসালয়ত কৰ্মৰত চিকিৎসক আৰু চিকিৎসা কৰ্মীসকলৰ নিৰাপত্তা সুনিশ্চিত কৰাৰ বাবে দাবী জনাই আহিছে যদিও চৰকাৰৰ অৱহেলাৰ বাবে এনে অমানৱীয় কাণ্ড সংঘটিত হবলৈ পালে৷
ডাঃ দেবেন দত্তৰ নিৰ্মম হত্যাকাণ্ডকলৈ সৰ্বস্তৰত প্ৰতিবাদ হ’ব লাগে বুলিও নেতা দুগৰাকী ৰাইজলৈ আহ্বান জনায়৷ চিকিৎসক সকলে নিজৰ জীৱনকো তুচ্ছ জ্ঞান কৰি দুৰ্গম এলেকাত চিকিৎসা সেৱা আগবঢ়োৱাৰ পিছতো মানৱতাৰ সৰ্বোচ্ছ সীমা চেৰাই গৈ বয়োজ্যেষ্ঠ চিকিৎসক গৰাকীক হত্যা কৰাৰ গৰিহনা দিয়াৰ ভাষা নাই৷ এনে কাৰ্যত জড়িত সকলক দৃষ্টান্ত মূলক শাস্তি দিব লাগে বুলিও দাবী জনায় চিকিৎসক নেতা দুগৰাকীয়ে ৷ আনহাতে চিকিৎসক সকল কৰ্মবিৰতিত থাকিলেও জৰুৰীসেৱা, আদালতৰ কৰ্তব্য, পষ্ট ম’ৰ্টেম, জৰুৰী অ’টিৰ কাম-কাজ চলি থাকিব বুলিও জানিব পৰা গৈছে ৷
www.assamtimes post.com
fb.com/assamtimespost2019
