ডিব্ৰুগড় জিলাৰ জালনি চাহ বাগিচাৰ ৯০ জন শ্ৰমিক আৰু কৰ্মচাৰী কোভিড পজিটিভ৷ যাৰ ফলত এতিয়া উজনি অসমৰ চাহ বেল্টত একপ্ৰকাৰ বিপদ ঘণ্টা বাজিছে। ইতিমধ্যে ডিব্ৰুগড় জিলা প্ৰশাসনে টেঙাখাত ৰাজহ চক্ৰৰ অন্তৰ্গত জালনি চাহ বাগিচাক কণ্টেইনমেণ্ট জ’ন হিচাপে ঘোষণা কৰিছে আৰু বাগিচাখন বন্ধ কৰি দিছে। টেঙাখাত ৰাজহ চক্ৰৰ চক্ৰ বিষয়া, বৃক্ষৰোপণ বিভাগৰ চিকিৎসা পৰিদৰ্শক আৰু স্বাস্থ্য বিভাগৰ বিষয়াসকলে পৰিস্থিতিৰ বুজ ল’বলৈ ইতিমধ্যে বাগিচাখনত গৈ উপস্থিত হৈছে। বাগিচাখনৰ চিকিৎসালয় আৰু কৰ্মচাৰীৰ দুটা খালী কোৱাৰ্টাৰ পজিটিভ ৰোগীসকলৰ বাবে অস্থায়ী কোৱাৰেণ্টাইন কেন্দ্ৰলৈ পৰিৱৰ্তন কৰা হৈছে।
ডিব্ৰুগড়ৰ আইডিএছপিৰ জিলা নিৰীক্ষণ বিষয়া ডঃ নৱজ্যোতি গোঁহায়ে কয় যে আজিৰ পৰা বাগিচাখনত চেনিটাইজেচন আদিৰ দৰে অন্যান্য ব্যৱস্থাৰ উপৰি টীকাকৰণ অভিযান চলোৱা হ’ব।
