কাৰ্বি স্বায়ত্ত পৰিষদৰ চিইএম তুলিৰাম ৰংহাঙৰ মহানুভৱতাঃ জটিল ৰোগত আক্ৰান্তক ৫০ হাজাৰ টকাকৈ

ASSAM TIMES POST

আছাম টাইমছ্ প’ষ্টৰ বিশেষ প্ৰতিবেদন

প্ৰতিবেদন যুগুতালে ছাইদুল ইছলামঃ 

শাসনৰ গাদীত বহাৰ পাছত এচাম ক্ষমতালোভী জননেতাই নিজৰ লাস-বিলাসত মচগুল হৈ প্ৰজা বা সাধাৰণ জনতা তথা দুখীয়া-দৰিদ্ৰ লোকলৈ পিঠি দিয়াৰ উদাহৰণ অলেখ আছে৷ 

কিন্তু সেই সকলোবোৰ ধাৰণা নুই কৰি তিনিবাৰকৈ কাৰ্বি আংলং স্বায়ত্তশাসিত পৰিষদৰ গাদী দখল কৰা তুলিৰাম ৰংহাঙে ভাৰতীয় জনতা পাৰ্টিৰ আমোলত পৰিষদখনৰ মুখ্য কাৰ্যবাহী সদস্যৰ পদত অধিষ্ঠিত হোৱাৰ লগেলগেই যেন পণ কৰি লৈছে কাৰ্বি পাহাৰৰ অকল্পনীয় পৰিৱৰ্তন সাধন কৰাৰ৷

কাৰ্বি পাহাৰৰ দুৰ্গম এলেকাৰ জনসাধাৰণৰ দুখ-দুৰ্দশাৰ কথা সোঁশৰীৰে বুজ লৈ সেইবোৰ অঞ্চলৰ সৰ্বাঙ্গীন উন্নয়ন, বিভিন্ন বাট-পথ, নগৰাঞ্চলৰ আমোল পৰিৱৰ্তনৰ লগতে স্প’ৰ্টছ কমপ্লেক্স, মিনি ষ্টেডিয়াম, ইনড’ৰ ষ্টেডিয়াম আদি নিৰ্মাণ কৰি জিলাখনত ক্ৰীড়া সংস্কৃতিৰ লগতে কৰ্মসংস্কৃতি গঢ়ি তুলিবলৈ উদ্যোগলৈ অহা পৰিলক্ষিত হৈছে৷

এমঅ’এছ বা এমইউএছ চুক্তিৰ বাবে আবণ্টিত পুঁজিৰ সদ ব্যৱহাৰ কৰি পাহাৰীয়া জিলাখনৰ সদৰ চহৰ ডিফুৰ ঐতিহাসিক পৰিৱৰ্তন সাধিবলৈ সক্ষম হৈছে জননেতা তুলিৰাম ৰংহাঙ৷ শেহতীয়াকৈ তেওঁৰ মহানুভৱতাৰ কথা প্ৰকাশ পাইছে জিলাখনৰ বিভিন্ন বিভিন্ন স্থানত দুৰাৰোগ্য আৰু জটিল ৰোগত ভুগি থকা একাংশ ৰোগীক ৫০ হাজাৰ টকাকৈ আৰ্থিক সাহায্য প্ৰদান কৰা কাৰ্যত৷

জানিব পৰা মতে, যোৱা কেইদিনৰ ভিতৰত মুখ্য কাৰ্যবাহী সদস্য তুলিৰাম ৰংহাঙে ৰংখাং পৰিষদীয় সমষ্টিৰ টেংকেৰালাংছ’ৰ ছিম ক্ৰামছাৰ কন্যা মিৰ্দান ক্ৰামছাপী জিএমচিএইচত দুৰাৰোগ্য ৰোগত চিকিৎসাধীন হৈ থকাৰ বাবে ৫০ হাজাৰ টকা, নিলীপ পৰিষদীয় সমষ্টিৰ দিলাৰাম টেৰণ গাঁৱৰ শিশু ৰবাৰ্ট টেৰাঙৰ চিকিৎসাৰ বাবদ ৫০ হাজাৰ টকা, দুৰ্ঘটনাত গুৰুতৰভাৱে আহত হোৱা বৰজান সমষ্টিৰ হিডিপি বে’ গাঁৱৰ মহিলা মৃত্যিকা তিচ’পীলৈ চিকিৎসাৰ বাবদ ৫০ হাজাৰ টকা, বোকাজান দেওপানীৰ জপৰালাংচ’ৰ মুখমণ্ডলত টিউমাৰত আক্ৰান্ত মহিলা বাৰিকা টেৰণপীলৈ ৫০ হাজাৰ টকা, নিলীপ পৰিষদীয় সমষ্টিৰে চ’কীহলাৰ অগ্নিদগ্ধ হোৱা ৰজনী ইংতিপীলৈ ৫০ হাজাৰ টকাৰ আৰ্থিক সাহায্য আগবঢ়াইছে৷ কাৰ্বি আংলং জিলা পৰিষদৰ মুখ্য কাৰ্যবাহী সদস্য তুলিৰাম ৰংহঙৰ এই প্ৰচেষ্টাত আছাম টাইমছ্ প’ষ্টৰ তৰফৰ পৰা ধন্যবাদ জ্ঞাপন কৰে৷