মৰঙি দৈগ্ৰোঙৰ ৩৯ নং ৰাষ্ট্ৰীয় ঘাইপথত ছাত্ৰ মুক্তি সংগ্ৰাম সমিতিৰ উত্তাল প্ৰতিবাদ

গোলাঘাটঃ ছাত্ৰ মুক্তি সংগ্ৰাম সমিতিৰ মৰঙি আঞ্চলিক সমিতিয়ে ৩ জুলাইত কেন্দ্ৰীয় চৰকাৰে অসমৰ বানপানী আৰু গৰাখহনীয়া সমস্যাক ৰাষ্ট্ৰীয় সমস্যা ৰূপে ঘোষণা নকৰাৰ সিদ্ধান্তৰ বিৰুদ্ধে উত্তাল প্ৰতিবাদ সাব্যস্ত কৰে৷ সংগঠনটোৱে ৩৯ নং ৰাষ্ট্ৰীয় ঘাইপথৰ মৰঙিৰ দৈগ্ৰোং অঞ্চলত তীব্ৰ প্ৰতিবাদ সাব্যস্ত কৰি কেন্দ্ৰীয় চৰকাৰক সকীয়াই দি “কেন্দ্ৰীয় চৰকাৰ হায় হায়”, “প্ৰধানমন্ত্ৰী নৰেন্দ্ৰ মোডী গ’ বেক”, ” মুখ্যমন্ত্ৰী সৰ্বানন্দ সোণোৱাল মুৰ্দাবাদ আদি বিভিন্ন চৰকাৰ বিৰোধী শ্ল’গানেৰে পৰিৱেশ উত্তাল কৰি তোলাৰ লগতে কেন্দ্ৰীয় জল আৰু শক্তি ৰাজ্য মন্ত্ৰী ৰতন লাল কাটীৰীয়াৰ জুমুঠি দাহ কৰি প্ৰতিবাদ সাৱ্যস্ত কৰে৷ প্ৰতিবাদস্থলিৰ পৰা ছাত্ৰ মুক্তি সংগ্ৰাম সমিতি মৰঙি আঞ্চলিক সমিতিৰ সভাপতি পিণ্টু গগৈয়ে কয়, অসমৰ কয়লা, তেল, চূণশিল, চাহপাত আদি অসমৰ সম্পদসমূহ যদি ৰাষ্ট্ৰীয় সম্পদ হ’ব পাৰে তেন্তে অসমৰ সমস্যাসমূহ কিয় ৰাষ্ট্ৰীয় সমস্যা হব নোৱাৰে? গতিকে শীঘ্ৰেই অসমৰ বানপানী সমস্যাক ৰাষ্ট্ৰীয় সমস্যা ৰূপে ঘোষণা নকৰিলে প্ৰতিবাদ অতি তীব্ৰতৰ হ’ব বুলি হুংকাৰ দিয়ে৷ এই প্ৰতিবাদী কাৰ্যসূচীত সংগঠনটোৰ বিষয়ববীয়াসকল উপস্থিত থাকে৷