ষ্টাফ ৰিপ’ৰ্টাৰ
ডিফু : “মন কৰিলেই ছন”, “অভ্যাশৰ নৰ কৰ্ণ পথে কৰে শৰ” এই আপ্ত বাকী কেইশাৰীৰ যথাযথ সৎ ব্যৱহাৰ কৰিছে পাহাৰীয়া জিলাৰ সদৰ চহৰ ডিফুৰ প্ৰিয়ঙ্কা শইকীয়াই ৷ অসাধ্যকো সাধন কৰি তাই এটি ক্ষুদ্ৰ চাউলৰ বক্ষত অংকণ কৰি উলিয়াইছে ভগৱান শ্ৰীগণেশৰ ছবি ৷ এনে কৃতিৰ বাবে প্ৰিয়ঙ্কা শইকীয়ীলৈ ৱৰ্লড ৰেকৰ্ডছ অৱ এক্সেলেন্সীৰ তৰফৰ পৰা ইণ্টাৰ নেছনেল বুক অৱ ৰেকৰ্ডছত প্ৰিয়ঙ্কা শইকীয়াৰ নাম অংকন কৰিছে ৷ তাইৰ এনে বিৰল কৃতিত্বৰ বাবে তাইলৈ ডাক যোগে পঠিয়াইছে এক প্ৰমাণ-পত্ৰ ৷ বিশ্বব্যাপি কৰোণা মহাৰীৰ প্ৰকোপ অব্যাহত থকাৰ মাজতে প্ৰিয়ঙ্কা শইকীয়াই ডিফুস্থিত আৰক্ষী ছাউনীৰ নিজ ঘৰতে বহি ০’০ আকাৰৰ বেজীৰে ০’২ মি,মি: ব্যাসাৰ্দ্ধ আৰু ০’৮ মি:মি: ব্যাসাৰ্দ্ধৰ এটি ক্ষুদ্ৰ চাউলৰ বুকুত অংকিত কৰে ভগৱান শ্ৰী গণেশৰ ছবি ৷
যোৱা ২২ এপ্ৰিলত মাত্ৰ ৫৮ ছেকেণ্ডত গণেশৰ ছবি অংকণ কৰি উলিওৱা প্ৰক্ৰিয়াটেৰ সম্পূৰ্ণ ভিডিঅ’ ৰেকৰ্ডিঙ ইণ্টাৰনেছনেল বুক অৱ ৰেকৰ্ডছলৈ প্ৰিয়ঙ্কাই প্ৰেৰণ কৰাৰ পিছত ১৮ জুনত ডাকযোগে প্ৰিয়ঙ্কাৰ হাতত পৰে তাইৰ বিশ্ব অভিলেখৰ প্ৰমাণ পত্ৰখন ৷ উক্ত প্ৰমান পত্ৰখন হাতত পাই স্বাভাৱিকতে উৎফুল্লিত হৈ পৰিছে প্ৰিয়ঙ্কা শইকীয়া ৷ ডিফু আৰক্ষী ছাউনিৰ নিৱসী প্ৰয়াত পদ্মকান্ত শইকীয়া আৰু ৰুমী দেৱীৰ কণ্যা প্ৰিয়ঙ্কা শইকীয়াৰ এনে সৃষ্টিশীল চিন্তাৰ বাবে এতিয়া প্ৰশংসাৰ পাত্ৰ হৈ পৰিছে ৷ প্ৰিয়ঙ্কা শইকীয়াই ডিফু শঙ্কৰদেৱ শিশু বিদ্যা নিকেতনৰ পৰা হাইস্কুল শিক্ষান্ত পৰীক্ষাত উত্তীৰ্ণ হোৱাৰ পিছত ডিফু ৰেণু তেৰণপী জুনিয়ৰ কলেজৰ পৰা উচ্চতৰ মাধ্যমিক পৰীক্ষাত উত্তীৰ্ণ হয় ৷ ইয়াৰ পিছত ক্ষেত্ৰীৰ ডিমৰীয়া কলেজৰ পৰা স্নাতক পৰীক্ষাত উত্ৰীৰণ হৈ অসম বিশ্ব বিদ্যালয় ডিফু চৌহদৰ পৰা নৃ-বিদ্যা বিভাগত স্নাতকোত্তৰ কৰে ৷
এই প্ৰতিবেদকৰ সৈতে হোৱা সাক্ষাৎকাৰত প্ৰিয়ঙ্কা শইকীয়াই কয় যে, আনৰ অভিলেখ ভংগ কৰাতকৈ নিজে কিবা নতুন সৃষ্টি কৰিব পাৰি নেকি তাৰে এক চিন্তা মনলৈ অহা ভাবে ক্ষুদ্ৰ চাউলৰ বুকুত গণেশৰ দৰে ছবি অংকণ কৰিবলৈ তাই সক্ষম হৈছে ৷ প্ৰিয়ঙ্কা শইকীয়াৰ ছবি অংকণৰ ওপৰিও বিভিন্ন নৃত্য, নাটক আদিচ সুৰুচি থকা বুলিও এই প্ৰতিবেদকৰ ওচৰত ব্যক্ত কৰে ৷
