ASSAM TIMES POST
ছাইদুল ইছলাম,ডিফুঃ কাৰ্বি আংলং সদৰ চহৰ ডিফুত জনস্বাস্থ্যৰ প্ৰতি ভাবুকি স্বৰূপ হৈ পৰা প্লাষ্টিকৰ ওপৰত নৱগঠিত ডিফু পৌৰ নিগমে তীব্ৰ অভিযান চলাই আজি বহু পৰিমানৰ প্লাষ্টিক জব্দ কৰে৷ ডিফু পৌৰ নিগমৰ অধ্যক্ষ ৰাহ ক্ৰ’ৰ নেতৃত্বত অতৰ্কিতে চলা এই অভিযানত অবৈধ ভাবে প্লাষ্টিকৰ ৰখাৰ বাবে ডিফু মূল বজাৰ, পাৱাৰ হাউছ, বিৰলা, তাৰালাংচ তিনিআলিৰ একাংশ ব্যৱসায়ীক পৌৰ নিগমৰ তৰফৰ পৰা জৰিমনা হিচাপে ১০০০ টকাকৈ জৰিমনা বিহে৷
এই সন্দৰ্ভত পৌৰ নিগমৰ অধ্যক্ষ ৰাহ ক্ৰ’ই সাংবাদিকৰ সৈতে হোৱা সাক্ষাৎকাৰত কয় যে, ডিফু পৌৰ নিগমৰ তৰফৰ পৰা পূৰ্বেই সংশ্লিষ্ট সকলো পক্ষৰ সৈতে আলোচনা মৰ্মে চহৰখনত স্বাস্থ্যৰ বাবে অপকাৰী প্ৰদূষণ সৃষ্টি হোৱাত সহায়ক প্লাষ্টিকৰ বিক্ৰি আৰু ব্যৱহাৰ বন্ধ কৰিবলৈ জাননী জাৰি কৰা হৈছিল যদিও একাংশ অসাধু পাইকাৰী ব্যৱসায়ীয়ে নিজৰ মুনাফা লাভৰ বাবে গোপনে উক্ত প্লাষ্টিকৰ বিক্ৰি অব্যাহত ৰাখিছিল ৷
অধ্যক্ষ ৰাহ ক্ৰ’ই উক্ত কাৰ্যৰ বিষয়ে ৱাৰ্ড কমিচনাৰ হাৰাধন ঘোষ, সাগৰ ছেত্ৰী ছিমন ফাংচ’ আৰু আন কেইবাগৰাকী ৱাৰ্ড কমিচনাৰ ডিফু পৌৰ নিগমৰ বিষয় ববীয়াক লগতলৈ এই অভিযান চলায়৷ আনহাতে একাংশ গাহৰি মাংস বিক্ৰেতাই গাহৰিৰ নোম ভালদৰে গৰম পানীৰে পৰিষ্কাৰ নকৰি গেছেৰে বা অন্য উপাদানেৰে জলাই নোম অপৰিষ্কাৰ কৰি বিক্ৰি কৰি থকা প্ৰত্যক্ষ কৰি গাহৰি বিক্ৰেতা সকলক নীতি বহিঃৰ্ভূতবাবে গাহৰি বিক্ৰি কৰাৰ বাবেও ১০০০ টকাকৈ জৰিমনা বিহে৷
ইয়াৰ পিছতো চহৰখনৰ কোনো দোকানত প্লাষ্টিকৰ ক্ৰয়-বিক্ৰয় হয় আৰু গাহৰী মাংস ব্যৱসায়ী সকলে যদি গাহৰি নোম ভালদৰে পৰিষ্কাৰ কৰি গাহৰি বিক্ৰি নকৰে তেন্তে এনে অপৰাধৰ বাবে পৰৱৰ্তী জৰিমনা ১০,০০০ টকালৈ বৃদ্ধি কৰা হ’ব বুলি অধ্যক্ষ গৰাকীয়ে জানিবলৈ দিছে ৷ শেষত আজি জব্দ কৰা প্লাষ্টিক সমূহ ডিফু ৰাজহুৱা শ্মশান ঘাট পথত জ্বলাই দিয়া হয় ৷
