ASSAM TIMES POST
বকলীয়াঘাট/ডিফুঃকাৰ্বি আংলং জিলাৰ মাঞ্জা আৰক্ষীয়ে নৱগঠিত উগ্ৰপন্থী সংগঠন ডিমাছা নেছনেল লিবাৰেছন আৰ্মী চমুকৈ ডিএনএলএৰ এগৰাকী মহিলা লিংকমেনক আটক কৰা ঘটনাত চাঞ্চল্যৰ সৃষ্টি হৈছে ৷
প্ৰাপ্ত খবৰ অনুসৰি ডিএনএলএৰ পৰা মাঞ্জাৰ এগৰাকী বালি ব্যৱসায়ীক ডিএনএলৰ তৰফৰ পৰা ৫০ হাজাৰ টকা দাবী কৰাত ব্যৱসায়ী জনে ২০ হাজাৰ টকা দিবলৈ সন্মত হয় আৰু উক্ত ধনৰ বাবে ব্যৱসায়ীজনৰ ঘৰত এগৰাকী মহিলা আহি ব্যৱসায়ী জনৰ পৰা ধনখিনি লৈ যায় ৷
পিছত আৰক্ষীয়ে গম পাই ব্যৱসায়ী জনক এই সন্দৰ্ভত সোধ পোছ কৰাত ব্যৱসায়ী জনে উক্ত মহিলাগৰাকীক ২০ হাজাৰ টকা দিয়া বুলি কয় ৷ ব্যৱসায়ী জনৰ স্বীকাৰোক্তিৰ ভিত্তিত মাঞ্জা থানাৰ ভাৰপ্ৰাপ্ত বিষয়া জিতুমনি ডেকাৰ নেতৃত্বত মাঞ্জা আৰক্ষীয়ে মাঞ্জা থানা এলেকাধীন আপাৰ ইকৰাণীৰ নিজ ঘৰৰ পৰা টুনকিম বডোচা (৩২) নামৰ মহিলা গৰাকীক আটক কৰিবলৈ সক্ষম হয় ৷
ধৃত মহিলা লিমকমেনজনীৰ পৰা নগদ ৮ হাজাৰ টকা উদ্ধাৰ কৰিছে বুলি আৰক্ষীৰ সূত্ৰে জানিব পৰা গৈছে ৷ এই সন্দৰ্ভত মাঞ্জা থানাত ২৩/১৯ নম্বৰত ভাৰতীয় দণ্ডবিধি আইনৰ ধাৰা ১২০(খ), ৩৮৭/৩৪ ত এক গোছৰ ৰুজো দি জেৰা অব্যাহত ৰাখিছে বুলি জানিব পৰা গৈছে ৷ ধৃত মহিলা গৰাকী ডিএনএলএৰ ছেকেণ্ড লেফটেনেণ্ট হাওলাট নুনিছা ওৰফে ৰাইথাইৰ পত্নী টুনকিম বডোছা (৩২) বুলি জানিব পৰা গৈছে ৷ মাঞ্জা আৰক্ষীৰ প্ৰচেষ্টাক ৰাইজে শলাগ লৈছে ৷
