ASSAM TIMES POST
ডিফুঃ ৰাজ্যৰ চাহ বাগিচাসমূহত সংঘটিত গৰিষ্ঠসংখ্যক অপৰাধৰ মূল কাৰণ হিচাপে সুৰা সেৱনকে গণ্য কৰি অহাৰ সময়তে তেনে এক ঘটনাই সংঘটিত হৈছে বোকাজানত। ইয়াৰ ৰামানগৰ চাহ বাগিচাত সোমবাৰে সন্ধিয়া পিতৃয়ে পুত্ৰক হত্যা কৰাক লৈ অঞ্চলজুৰি তীব্ৰ চাঞ্চল্যৰ সৃষ্টি হৈছে।
প্ৰাপ্ত তথ্য মতে, সোমবাৰে সন্ধিয়া অলবেলা কোঁৱৰ নামৰ লোকজনে বাহিৰত আকণ্ঠ সুৰাপান কৰি আহি ঘৰত প্ৰবেশ কৰেহি। সেই সময়ত তেওঁৰ পুত্ৰ মিন্টু কোঁৱৰ ঘৰৰ বাহিৰত আছিল। ক্ষন্তেক পিছতে মিন্টু কোঁৱৰে ঘৰ সোমোৱাত অলবেলা কোঁৱৰে ‘কিয় দেৰিকৈ ঘৰত সোমাবি’ বুলি দাৰে ঘঁপিয়াই হত্যা কৰে।
সেই সময়তে তেওঁৰ কন্যা ঘৰতে থকাৰ পৰিপ্ৰেক্ষিতত হৈ যোৱা ঘটনাটো প্ৰত্যক্ষ কৰি চিঞৰি–চিঞৰি কান্দিবলৈ আৰম্ভ কৰে। তেতিয়াই পাষাণ অলবেলাই কন্যাকো দাৰে ঘঁপিয়াই হত্যা কৰিবলৈ উদ্যত হৈ পৰে। কিন্তু তেওঁৰ কন্যাই বাহিৰলৈ দৌৰ মাৰি প্ৰাণ ৰক্ষা কৰিবলৈ সক্ষম হয়। ঘটনা সম্পৰ্কত ওচৰ-চুবুৰীয়াই জনোৱা মতে, অলবেলা কোঁৱৰে দীৰ্ঘদিনৰ পৰা সুৰাপান কৰি আহিছিল।
যাৰ মানসিক আৰু শাৰীৰিক অত্যাচাৰৰ বলি হৈ আহিছিল পুত্ৰ-কন্যাকে ধৰি পৰিয়ালৰ আন সদস্যসকল। মদ খাই আহি অলবেলাই ঘৰত কৰা অশান্তিৰ ভূক্তভোগী হৈ আহিছে ওচৰ-চুবুৰীয়া লোকসকলো। ইপিনে ঘটনা সংঘটিত কৰাৰেপৰা বৰ্তমানলৈকে অলবেলা কোঁৱৰ পলাতক অৱস্থাত আছে। ঘটনা সম্পৰ্কত আৰক্ষী প্ৰশাসনৰ লোকে তদন্ত অব্যাহত ৰাখিছে বুলি জানিবপৰা গৈছে।
