ASSAM TIMES POST
ডিফুঃ ডিফুৰ ব্যৱসায়ী তথা অসম সাহিত্য সভাৰ ডিফুস্থিত আঞ্চলিক কাৰ্যালয় ৰাংছিনা ভৱনৰ অৱৰক্ষণ সমিতিৰ সদস্য ৰাম অৱতাৰ স্বামীৰ বিৰুদ্ধে শেহতীয়াকৈ প্ৰস্তাৱ গ্ৰহণ কৰিছে এই সমিতিয়ে। গত ১০ ছেপ্টেম্বৰত ৰাংছিনা ভৱনত অনুষ্ঠিত অৱৰক্ষণ সমিতিৰ বৰ্ধিত সভাতে এই প্ৰস্তাৱ গ্ৰহণ কৰা হয়।
ইতিমধ্যে এই প্ৰস্তাৱৰ প্ৰতিলিপি অসম সাহিত্য সভাৰ প্ৰধান সম্পাদকলৈ প্ৰেৰণ কৰা হৈছে আৰু এই সন্দৰ্ভত বিহিত ব্যৱস্থা গ্ৰহণ কৰিবলৈয়ো আহ্বান জনোৱা হয়। ইয়াত স্পষ্টকৈ উল্লেখ আছে এইবুলি, ‘ৰাংছিনা ভৱনৰ অৱৰক্ষণ সমিতিৰ সদস্য ৰাম অৱতাৰ স্বামীয়ে অনৈতিক কাৰ্যত লিপ্ত হৈ সভাক জনমানসত হেয় প্ৰতিপন্ন কৰাৰ হেতু, তেওঁৰ সদস্য পদ আৰু সাধাৰণ সদস্য তথা হিতৈষী সদস্য পদ বাতিলৰ প্ৰস্তাৱ গ্ৰহণ কৰা হয়।’
উল্লেখযোগ্য যে জিলাখনৰ এজন প্ৰতিষ্ঠিত ব্যৱসায়ী হোৱাৰ সুবাদতে ৰাম অৱতাৰ স্বামীৰ এক গোচৰৰ ভিত্তিত আৰক্ষীয়ে গ্ৰেপ্তাৰ কৰিছিল অসম সাহিত্য সভাৰ ডিফু আঞ্চলিক কাৰ্যালয়ৰ সম্পাদকগৰাকীক। পৰৱৰ্তী সময়ত আৰক্ষীয়ে তেওঁক ন্যায়িক জিম্মালৈ প্ৰেৰণ কৰে। তেতিয়াৰপৰাই এই কাৰ্যত ক্ষোভিত হৈ আহিছে কাৰ্বি আংলং আৰু ডিফু সাহিত্য সভা তথা ইয়াৰ দল-সংগঠনসমূহ।
এই সন্দৰ্ভত স্বামীকো তদন্তৰ আউটিলৈ আনিবলৈ ইতিমধ্যে কাৰ্বি আংলঙৰ উপায়ুক্ত মুকুল কুমাৰ শইকীয়াকো এখন আৱেদন দিছিল সাহিত্য সভাই।
