ষ্টাফ ৰিপ’ৰ্টাৰ:
ডিফু : ডিফু অসামৰিক চিকিৎসালয়খন ডিফু চিকিৎসা মহাবিদ্যালয়লৈ পৰিণত হোৱাৰ পিছত তাত কৰ্মৰত একাংশ ঠিকাভিত্তিক চতুৰ্থ বৰ্গৰ কৰ্মচাৰীলৈ নামি আহিছিল ঘোৰ অমানিশা ৷ এইলৈ এক প্ৰকাৰ আন্দোলনমূখী হৈ পৰিছিল চিকিৎসালয়খনত কৰ্মৰত ঠিকাভিত্তিক ৱাৰ্ড বয় আৰু ৱাৰ্ড গাৰ্ল ৷
নিজৰ হেৰুৱা চাকৰি ঘূৰাই পাবলৈ এইসকল অসহায় চতুৰ্থবৰ্গৰ কৰ্মাচাৰীয়ে কাৰবি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাহাঙৰ পৰা আৰম্ভ কৰি বিভাগীয় ইএম আনকি মুখ্যমন্ত্ৰী ডাঃ হিমন্ত বিশ্ব শৰ্মাৰ ওচৰতো স্মাৰক-পত্ৰ অৰ্পণ কৰিছিল বুলি আজি সংবাদ মেলত উল্লেখ কৰে সভানেত্ৰী মেক্ৰী ৰংপিপী আৰু সম্পাদিতা নিলিমা ছিংনাৰপীয়ে ৷
মুখ্য কাৰ্যবাহী সদস্য তুলিৰাম ৰংহাঙৰ আশ্বাস মতে তাৰে কেইগৰাকী মানে চিকিউৰিটি গাৰ্ড আদিৰ দৰে কামত অস্থায়ী ঠিক ভিত্তিক কাম কৰি আছে যদিও তাকলৈ সন্তুষ্ট নহয় ৱাৰ্ডবয়, ৱাৰ্ড গাৰ্ল মেনেজমেণ্ট ছচাইটি ৷
পূৱ আৰু পশ্চিম কাৰবি আংলঙৰ মুঠ ২৪ গৰাকীকৈ চাকৰি বঞ্চিত এনে কৰ্মচাৰীয়ে পুণৰ বিভাগীয় কৰ্তৃপক্ষৰ ওচৰত নিযুক্তি বিচাৰি আবেদন জনাইছে আৰু তেওঁলোকক এনে পদত পুণৰ স্থায়ী ভাবে নিযুক্তি দিবলৈ সংবাদমেলযোগে দাবী জনাইছে সভানেত্ৰী আৰু সম্পাদিকাদ্বয়ে ৷
