ছাইদুল ইছলাম
ডিফু : কাৰ্বি আংলঙৰ বোকাজান মহকুমাৰ দুঠাইত দুটাকৈ মৃতদেহ উদ্ধাৰ হোৱা ঘটনাত তীব্ৰ চাঞ্চল্যৰ সৃষ্টি হৈছে ৷ প্ৰাপ্ত খবৰ অনুসৰি বোকাজান মহকুমাৰ অন্তৰ্গত ডিলাইত আজি এক অচিনাক্ত গলিত মৃতদেহ উদ্ধাৰ হোৱাৰ বিপৰীতে লাহৰিজানত বনৰীয়া আক্ৰমণত এগৰাকী মহিলাৰ প্ৰাণ নাশ হোৱাৰ বাতৰি পোহৰলৈ আহিছে । ঘটনাৰ বিৱৰণি অনুসৰি, বুধবাৰে দিনৰ প্ৰায় ১১ বজাত গৰু চৰাবলৈ যোৱা এজন লোকে ডিলাই থানাৰ অন্তৰ্গত কয়লাজান এলেকাৰ মন বাহাদুৰ গাঁৱৰ খিলাই নলাৰ সমীপত এটা গলিত প্ৰায় পুৰুষৰ মৃতদেহ প্রত্যক্ষ কৰে। স্থানীয় লোকে লগে লগে এই সম্পৰ্কে আৰক্ষীক অৱগত কৰাত ডিলাই থানাৰ ভাৰপ্ৰাপ্ত বিষয়া লুটফুৰ ৰহমানৰ নেতৃত্বত আৰক্ষীৰ এটা দল ঘটনাস্থলীত উপস্থিত হৈ মৃতদেহটো উদ্ধাৰ কৰাৰ লগতে মৰণোত্তৰ পৰীক্ষাৰ বাবে প্ৰেৰণৰ ব্যৱস্থা কৰে।
আনহাতে, আজি পুৱাৰ ভাগত অসম-নাগালেণ্ড সীমান্তৱর্তী লাহৰীজানত বনৰীয়া হাতীৰ আক্ৰমণত এগৰাকী মহিলা নিহত হোৱাৰ বাতৰি পোৱা গৈছে। নিহত মহিলাগৰাকী লাহৰীজান চানডে’ বজাৰৰ ফাইজুৰ ৰহমানৰ পত্নী নাজবুৰ বেগম বুলি চিনাক্ত কৰা হৈছে। প্ৰাপ্ত তথ্য অনুসৰি, আজি পুৱাৰ ভাগত মহিলাগৰাকীয়ে উক্ত স্থানত খৰি লুৰিবলৈ যোৱাৰ সময়তে বনৰীয়া হাতীৰ সন্মুখীন হোৱাত বনৰীয়া হাতীয়ে চলোৱা আক্ৰমণত মহিলাগৰাকী থিতাতে নিহত হয়। স্থানীয় লোকে লগে লগে আৰক্ষীক এই বিষয়ে অৱগত কৰাত আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে ডিফুলৈ প্ৰেৰণৰ ব্যৱস্থা কৰে।
