ডিফু চিকিৎসা মহাবিদ্যালয়ৰ মৰ্গত ৭২ ঘণ্টাৰ বাবে সংৰক্ষিত হৈ আছে এটি দাবীহীন ৭০ বছৰীয়া বৃদ্ধা মহিলাৰ মৃতদেহ ৷ আৰক্ষীৰ সূত্ৰে প্ৰাপ্ত তথ্য অনুসৰি যোৱা ২৬ এপ্ৰিলত এজন লোকে নিজকে মাঞ্জা ৯ মাইলৰ শঙ্কৰ চৰ্দাৰ বুলি চিনাকি দি ৭০ বছৰীয়া ৰাণী চৰ্দাৰ নামৰ বৃদ্ধা ৰোগীয়া মহিলাক ডিফু চিকিৎসা মহাবিদ্যালয় আৰু হাস্পাতালত চিকিৎসাৰ বাবে ভৰ্তি কৰে ৷
বৃদ্ধা মহিলা গৰাকীক চিকিৎসালয়ত ভৰ্তি কৰিয়েই লোকজন অন্তৰ্ধান হয় ৷ আনহাতে বৃদ্ধা মহিলাগৰাকী চিকিৎসাধীন হৈ থকাৰ মাজতে যোৱা ৫ এপ্ৰিলত মৃত্যু বৰণ কৰে ৷ ইয়াৰ পিছত চিকিৎসালয় কৰ্তৃপক্ষৰ পৰা গম পোৱাৰ পিছত ডিফু আৰক্ষীয়ে বৃদ্ধা মৃত মহিলা গৰাকীৰ স্বামী আৰু আত্মীয়ক মাঞ্জা ৯ মাইলত বিচাৰ-খুছাৰ কৰিও একো সন্ধান উলিয়াবলৈ সক্ষম নহ’ল ৷
পৰৱৰ্তী সময়ত জিলা দণ্ডাধীশৰ নিৰ্দেশ অনুসৰি উক্ত মহিলা গৰাকীৰ মৃতদেহটো ৭২ ঘণ্টাৰ বাবে ডিফু চিকিৎসা মহাবিদ্যালয়ৰ মৰ্গত সংৰক্ষণ কৰি ৰখাৰ ব্যৱস্থা কৰা হৈছে ৷
কোনো ব্যক্তি মহিলা গৰাকীৰ মৃতদেহ চিনাক্ত কৰিব পাৰিলে ডিফু চিকিৎসা মহাবিদ্যালয়ৰ অধ্যক্ষ আৰু আৰক্ষীৰ সৈতে যোগাযোগ কৰিবলৈ আৰক্ষীয়ে জনাইছে ৷ আনহাতে এই ডিফু থানাত ১১০/০৬ নম্বৰত দৈনিক পঞ্জীত দৰজ দি ৰখা বুলিও আৰক্ষীৰ সূত্ৰটোত প্ৰকাশ আছে ৷
