মানৱ শৃংখল গঢ়ি দীপান্বিতাত শব্দ প্ৰদূষণ ৰোধৰ আহ্বান নগাঁও মহাবিদ্যালয়ৰ ছাত্ৰ -ছাত্ৰীৰ

ASSAM TIMES POST

নগাঁও ২৫ অক্টোবৰ: পোহৰৰ উৎসৱ দীপান্বিতাক আদৰিবলৈ ব্যস্ত হৈ পৰিছে ৰাজ্যবাসী। এটা দিনৰ পাচতেই চৌপাশ আলোকসজ্জাৰে উজ্জ্বলি উঠিব । আনহাতে আলোকসজ্জাৰ সমান্তৰালকৈ ফটকা, আতচবাজিৰ শব্দৰে মুখৰিত হব জনাঞ্চল । দীপান্বিতাৰ এনে আনন্দ -উছাহৰ মাজত ফটকাই সৃষ্টি কৰিব পৰা শব্দ প্ৰদূষণক লৈ উদ্বিগ্ন হৈ পৰিছে সচেতন সমাজ।দীপাৱলীত ফটকাৰ শব্দৰ বিপৰীতে মৃন্ময় বন্তিৰ পোহৰেৰে নিজৰু ঘৰখন অথবা অঞ্চলক আলোকিত কৰি তুলিবলৈ আহ্বান জনাইছে নগাঁও মহাবিদ্যালয়ৰ ছাত্ৰ-ছাত্ৰীসকলে।

প্ৰদূষণ ৰোধ আৰু পক্ষীকূলৰ প্ৰতি অহা ভাবুকি ৰোধৰ বাবে নগাঁও মহাবিদ্যালয়ৰ ছাত্ৰ-ছাত্ৰ
সকলৰ উদ্যোগত লোৱা হ’ল মানৱ-শৃংখলৰ কাৰ্যসূচী। দীপাৱলীক শব্দ প্ৰদূষণৰ বিপৰীতে আলোকৰ উৎসৱ হিচাপে গঢ়ি তোলাৰ লক্ষ্যৰে এই কাৰ্যসূচী গ্ৰহণ কৰা হয়। নগাঁও মহাবিদ্যালয়ৰ অধ্যক্ষ ড° শৰৎ বৰকটকী আৰু প্ৰবক্তা ড° ভূৱন চন্দ্ৰ চুতীয়াৰ উপস্থিতি সহস্ৰাধিক ছাত্ৰ-ছাত্ৰীয়ে এই মানৱ শৃংখলৰ কাৰ্যসূচীত অংশগ্ৰহণ কৰে।

উল্লেখ্য, নগাঁও মহাবিদ্যালয় চৌহদত থকা প্রায় এক হেক্টৰ বৰ্গৰ জলাশয়টোত প্ৰতি বছৰে শীতৰ আগমনৰ লগে লগে দেশী- বিদেশী পৰিভ্রমী পক্ষীৰে ভৰি পৰে। নগৰীয়া জীৱনৰ যান্ত্রিকতাৰ মাজত থকা বহুলোকে এক শান্ত পৰিবেশত এই জলাশয়টোত বসতি কৰা পক্ষকুলৰ কাকলি আৰু নৃত্য উপভোগ কৰি বিমল আনন্দ লভে । সেয়ে দীপান্বিতাৰ নিশা ফটকাৰ শব্দই যাতে জলাশয়টোৰ পক্ষীসমূহক আমনি অথৱা ক্ষতি সাধন নকৰে তাৰ প্ৰতি সচেতন হবলৈ নগাঁও মহাবিদ্যালয় কৰ্তৃপক্ষ আৰু ছাত্ৰ-ছাত্ৰীসকলে সকলোকে আহ্বান জনাইছে ।