উত্তৰ লক্ষীমপুৰ মহাবিদ্যালয় (স্বায়ত্বশাসিত)ত চাৰিদিনীয়া কাৰ্যসূচীৰে অনুষ্ঠিত অসম কলেজ শিক্ষক সন্থাৰ ৬৭ সংখ্যক অধিৱেশনত নগাঁও মহাবিদ্যালয়ৰ প্ৰাণী বিজ্ঞান বিভাগৰ সহকাৰী অধ্যাপক ড: ভুৱন চন্দ্ৰ চুতীয়াক অসম কলেজ শিক্ষক সন্থাৰ গৱেষণা আৰু উদ্ভাৱনী বঁটা প্ৰথম বাৰৰ বাবে প্ৰদান কৰা হয় ।
এই বঁটাত এক লাখ টকা সহ মান পত্ৰ আৰু বঁটা প্ৰদান কৰা হয়। উল্লেখ্য যে প্ৰাণী বিজ্ঞানী ড° চুতীয়াই বিশেষ পদক্ষেপৰ অংশীদাৰ হৈ অবিভক্ত নগাঁও জিলাৰ ১০-১২খন গাঁৱৰ দুই শতাধিক উদ্যোগী মহিলাই ৰেচম এৰী বস্ত্ৰ উৎপাদন, এৰী লেটাৰে খাদ্য প্ৰস্তুত কৰি এক বিপ্লৱৰ সূচনা কৰে। ড° চুতীয়াই সম্পূৰ্ণ বৈজ্ঞানিক পদ্ধতিৰে এৰী ৰেচম পলু পালনেৰে স্বাৱলম্বিতাৰ দিক দৰ্শন কৰিবলৈ সক্ষম হয়।
উল্লেখ্য যে নৱ প্ৰজন্মৰ মাজত ক্ৰমান্বয়ে এলাগী হ’বলৈ ধৰা ৰেচম পলুৰ বৈজ্ঞানিক ভাৱে পালন আৰু বস্ত্ৰ উৎপাদনৰ যোগেদি দুই শতাধিক মহিলাৰ স্বাৱলম্বীতাৰ বাট দেখুৱাই গ্ৰাম্যাঞ্চলৰ পলু পালকৰ ক্ষেত্ৰখনলৈ অধ্যাপক গৰাকীয়ে আশাৰ বাৰ্তা কঢ়িয়াই আনিছে।উল্লেখ্য যে অবিভক্ত নগাঁও জিলাৰ বিভিন্ন অঞ্চলৰ কেইবাখনো গাঁৱত পূৰ্বৰে পৰা পৰম্পৰাগত ভাৱে অসমীয়া সংস্কৃতিৰ অবিচ্ছেদ্য অংগ এৰী পলু পালন আৰু বস্ত্ৰ উৎপাদনৰ কাম চলি আছিল যদিও সময়ৰ সোঁতত ক্ৰমান্বয়ে ই এলাগী হ’বলৈ ধৰে।
কিন্তু বহু সম্ভাৱনাপূৰ্ণ এৰী শিল্পৰ পুণৰুজ্জীৱিতকৰণ আৰু উত্তৰণৰ বাবে একক ভাৱে প্ৰশংসনীয় পদক্ষেপ গ্ৰহণ কৰি গৱেষক তথা প্ৰাণী বিজ্ঞানী ড: চুতীয়া এই ক্ষেত্ৰত যথেষ্ট সফলো হয়। বিশেষকৈ ৰং বিৰঙৰ কাপোৰৰ চাহিদাৰ প্ৰতি লক্ষ্য ৰাখি এৰী সূতাত প্ৰাকৃতিক আৰু জৈৱিক ৰং ব্যৱহাৰ কৰাৰ পদ্ধতি গ্রহণ কৰা হয়।শিপিনী সকলে নিজে উৎপাদন কৰা এৰী সূতাত প্ৰাকৃতিক ভাৱে উপলব্ধ বিভিন্ন ৰং যেনে- হালধি, শেৱালি ফুল, কঠাল, তামোল, ডালিম, জেতুকা, লা, সেন্দুৰ, নীল, মাছৰ পিত্তৰ পৰা তৈয়াৰ কৰা জৈৱিক ৰং দি সেই সূতাৰে ৰং বিৰঙৰ এৰী বস্ত্ৰ প্ৰস্তুত কৰা হয় ।
এই ৰং বিৰঙৰ বস্ত্ৰই বজাৰ দখল কৰিবলৈকো সক্ষম হৈছে।স্মৰ্তব্য যে মৰিগাঁও জিলাৰ মায়ঙৰ বঙালবড়ী গাঁৱৰ শিপিনী সকলে জ্যোতিময়ী মাছাৰীৰ নেতৃত্বত নতুন দিল্লীত অনুষ্ঠিত এক আন্তঃৰাষ্ট্ৰীয় বাণিজ্য মেলাত অংশগ্ৰহণ কৰে। আনহাতে উক্ত বাণিজ্য মেলাত এৰী সূতাত প্ৰাকৃতিক আৰু জৈৱিক ৰং ব্যৱহাৰ কৰি তৈয়াৰ কৰা এৰী বস্ত্ৰই বাণিজ্যিকভাৱে যথেষ্ট সমাদৰ লাভ কৰিবলৈ সক্ষম হয়।আনকি ফ্ৰান্স, অষ্ট্ৰেলিয়া আদি দেশৰ গ্ৰাহকৰ পৰাও ৰং বিৰঙৰ এৰী বস্ত্ৰৰ বাবে আগতীয়া অৰ্ডাৰ লাভ কৰিবলৈ সক্ষম হয়।
প্ৰাণী বিজ্ঞানী ড° চুতীয়াৰ পৰামৰ্শ ক্ৰমে গোট সমূহে এৰী পলু পুহি এৰী বস্ত্ৰ তৈয়াৰ কৰাৰ লগতে বহুমুখী ব্যৱসায় গঢ়ি তোলাৰো আঁচনি গ্ৰহণ কৰিছে। এই প্ৰশংসনীয় পদক্ষেপৰ বাবে ড: চুতীয়াক অসম কলেজ শিক্ষক সন্থাৰ গৱেষণা আৰু উদ্ভাৱনী বঁটা প্ৰদান কৰা বুলি জানিব পৰা গৈছে ।এই বঁটা গ্ৰহণ কৰি ড° চুতীয়াই ভৱিষ্যতে দুগুন উৎসাহেৰে কাম কৰি যাব বুলি মন্তব্য কৰাৰ লগতে অসম কলেজ শিক্ষক সন্থা আৰু নগাঁও মহাবিদ্যালয়ৰ পৰিয়ালক কৃতজ্ঞতা জ্ঞাপন কৰে।
