ASSAM TIMES POST
নগাঁও : নগাঁও চহৰৰ হয়বৰগাঁৱত ঘাইপথৰ কাষত থকা এটা শিৱমন্দিৰ নিশা গোপনে উচ্চেদ কৰাক লৈ আজি নগাঁও চহৰৰ হয়বৰগাঁৱত উত্তপ্ত পৰিস্থিতিৰ সৃষ্টি হয় । নিশা মনে মনে পথ নিৰ্মান কৰা ঠিকাদাৰে জে চি বি লগাই পকী শিৱমন্দিৰটো ভাঙি চুৰমাৰ কৰাত পুৱাৰে পৰা হয়বৰগাঁৱত উত্তেজনাৰ সৃষ্টি হয় । মন্দিৰটোৰ পকী বেৰা , লোহাৰ গ্ৰীল আদি ভাঙি পেলোৱাৰ লগতে উচ্চেদকাৰীয়ে শিৱলিংগ , দান পাত্ৰ আদি লৈ যায় ।
পথ নিৰ্মান কৰা ঠিকাদাৰ উত্তমচান্দ নাহতাই মন্দিৰ সমিতিৰ লগত যোগাযোগ নকৰাকৈ নিশা মন্দিৰটো গোপনে উচ্চেদ কৰি ধৰ্মীয় অনুভূতিত আঘাট কৰা বুলি একাংশ লোকে অভিযোগ উত্থাপন কৰে। আনহাতে আজি পুৱা ১০.৩০ বজাত একাংশ ক্ষুব্ধ লোকে হয়বৰগাঁৱত পুৰণা ৩৭ নং ৰাষ্ট্ৰীয় ঘাই পথ অৱৰোধ কৰি নগাঁও চহৰত অচলাৱস্হা সৃষ্টি কৰে ।
ফলত শ শ গাড়ী ৰাজপথত ৰৈ থাকিবলগীয়া হোৱাত ব্যাপক যানজঁট সৃষ্টি হয় ।পথ অৱৰোধকাৰী সকলে অভিযোগ কৰা মতে , ঠিকাদাৰে মন্দিৰ সমিতিক অৱগত নকৰাকৈ মনে মনে নিশা মন্দিৰটো ভাঙি শিৱলিংগৰ লগতে মন্দিৰৰ ভিতৰত থকা ঘন্টা , দানপাত্ৰ , ৪০ টা সোণৰ বেলপাত , ২৪ টা ৰূপৰ বেলপাত আৰু অন্যান্য সামগ্ৰী লৈ যায় । অৱৰোধকাৰী সকলক বুজাবলৈ জিলা প্ৰশাসনৰ বিষয়া অক্ষম হয় যদিও পিছত বিধায়ক ৰূপক শৰ্মাৰ হস্তক্ষেপত পৰিস্হিতি শান্ত হয় । ইপিনে গড়কাপ্তানী বিভাগৰ কাৰ্যালয়ত জমা ৰখা শিৱলিংগটো মন্দিৰ কমিটিক ঘূৰাই দিয়াৰ ব্যৱস্হা কৰে বিধায়ক শৰ্মাই। উল্লেখ্য, হয়বৰগাঁৱত ৰাষ্ট্ৰীয় ঘাই পথৰ দাঁতিত গড়কাপ্তানী বিভাগৰ মাটিত ১৯৯৬ চনত ‘ পঞ্চদুৱাৰ ‘ নামৰ শিৱমন্দিৰটো স্হাপন কৰা হৈছিল ।পৰৱৰ্তী সময়ত ভক্তৰ দান বৰঙনিৰে মন্দিৰটো সুন্দৰকৈ সজোৱা হয় । বৰ্তমান পথ বহলীকৰণৰ বাবে মন্দিৰটো উচ্চেদৰ জাননী দিয়া হয় । প্ৰশাসনৰ সুত্ৰত প্ৰকাশ পোৱা মতে কেইবাবাৰো জাননী দিয়াৰ পিছতো মন্দিৰটো উঠাই নিয়াৰ বাবে পৰিচালনা সমিতিয়ে ব্যৱস্হা গ্ৰহণ কৰা নাছিল ।
