নগাঁও চহৰৰ ঐতিহ্যমণ্ডিত নেহৰুবালিত যোৱা ১৪ জানুৱাৰীৰ পৰা অনুষ্ঠিত হোৱা সদৌ নগাঁও ভোগালী বিহু উৎসৱৰ কাৰ্যসূচীৰ অংশ হিচাপে জ্যোতি সংগীত, বিষ্ণু ৰাভা সংগীত, ভূপেন্দ্ৰ সংগীত, খগেন মহন্তৰ গীত আৰু আধুনিক গীতৰ প্ৰতিযোগিতা অনুষ্ঠিত হয়।
উল্লেখিত সমূহ প্ৰতিযোগিতাত অংশগ্ৰহণ কৰি শ্ৰেষ্ঠত্ব লাভ কৰা ‘ক’ আৰু ‘খ’ শাখাৰ পৰা দুগৰাকী প্ৰতিযোগীক শ্ৰেষ্ঠ কন্ঠশিল্পী হিচাপে নিৰ্বাচিত কৰা হয়।কন্ঠশিল্পী দুগৰাকী হৈছে- ‘ক’ শাখাৰ নিষ্ঠাজিতা কলিতা আৰু ‘খ’ শাখাৰ হৃষিকা বৰা। সামাজিক সাংস্কৃতিক অনুষ্ঠান গান্ধাৰৰ তৰফৰ পৰা শিল্পী দুগৰাকীলৈ বঁটা-সন্মান আগবঢ়োৱা হয়।
গান্ধাৰৰ প্ৰয়াত সভাপতি সুৰৰত্ন যজ্ঞ বেজবৰুৱা,সংগীতজ্যোতি অজিত দত্ত , মুক্তিযোদ্ধা মুখেশ্বৰ মজুমদাৰ আৰু বিমল শইকীয়াৰ সোঁৱৰণত এই বঁটাসমূহ আগবঢ়াই তেওঁলোকৰ পৰিয়ালবৰ্গই। বঁটা প্ৰদান অনুষ্ঠানৰ আঁত ধৰে গান্ধাৰৰ সম্পাদক প্ৰদীপ বৰাই।
শিল্পী দুগৰাকীলৈ সন্মান আগবঢ়াই দাতাৰ পৰিয়ালবৰ্গৰ লগতে গান্ধাৰৰ কৰ্মকৰ্তা আৰু ভোগালী বিহু উৎসৱ সমিতিৰ সম্পাদক জয়ন্ত কুমাৰ বৰা,যুটীয়া সম্পাদক সম্পাদক পবিত্ৰ কলিতা,সাংস্কৃতিক প্ৰতিযোগিতা উপ-সমিতিৰ আহ্বায়ক হৰেন নাথ, সাংস্কৃতিক উপ সমিতিৰ সম্পাদক প্ৰাঞ্জল বৰুৱা,অভিনেতা পৰিচালক দিব্যজ্যোতি শইকীয়া আদিয়ে ।
