কাৰবি আংলং (Karbi Anglong) স্বায়ত্তশাসিত পৰিষদৰ (Autonomous Council) প্ৰাথমিক শিক্ষা বিভাগৰ (Department of Primary Education) অধীনত আজি ১৩৩ গৰাকী প্ৰাথমিক শিক্ষকক স্থায়ী শিক্ষকৰূপে আনুষ্ঠানিকভাৱে নিযুক্তি প্ৰদান কৰা হয় ৷ কাৰবি আংলং স্বায়ত্তশাসিত পৰিষদৰ নতুন সচিবালয়ত অনুষ্ঠিত এক অনুষ্ঠানৰ জৰিয়তে পৰিষদৰ মুখ্য কাৰ্যবাহী সদস্য তুলিৰাম ৰংহাঙৰ (Tuliram Ronghang) উপস্থিতিত শিক্ষকসকলক নিযুক্তি-পত্ৰ প্ৰদান কৰা হয়৷
অনুষ্ঠানত তুলিৰাম ৰংহাঙে মুখ্য অতিথি হিচাপে উপস্থিত থকাৰ বিপৰীতে সাংসদ হৰেণছিং বে’ সন্মানীয় অতিথি হিছাপে উপস্থিত থাকে সভাত পাৰ্বত্য জিলাখনৰ তিনিগৰাকী বিধায়ক পৰিষদৰ সকলো কাৰ্যবাহী সদস্য আৰু এমএচি সকল লগতে বিভিন্ন ছাত্ৰ আৰু সামাজিক সংগঠনৰ নেতা-কৰ্মীসকল উপস্থিত থাকে ৷
পৰিষদৰ শিক্ষা বিভাগৰ ইএম ৰিচাৰ্ড টকবীয়ে আদৰণি ভাষণ প্ৰদান কৰি তুলিৰাম ৰংহাঙৰ নেতৃত্বত পৰিষদৰ শিক্ষা বিভাগৰ বৃহৎ পদক্ষেপ আখ্যা দিয়ে ৷ শিক্ষা বিভাগক পথিকৰুপে আগুৱাই নিয়াৰ বাবে আৰু শিক্ষককে নিষ্ঠা সহকাৰে কাৰ্যনিৰ্বাহ কৰিবলৈ টকবীয়ে আহ্বান জনায় ৷ সভাত ভাষণ প্ৰদান কৰি সাংসদ হৰেণছিং বে’য়ে পৰিষদৰ মুখ্য কাৰ্যবাহী সদস্য তুলিৰাম ৰংহাঙ আৰু অসমৰ মুখ্যমন্ত্ৰী ডঃ হিমন্ত বিশ্ব শৰ্মাৰ সৱল নেতৃত্বৰ বাবে এয়া সম্ভৱ হোৱা বুলি উল্লেখ কৰি আজি নিযুক্তি প্ৰাপ্ত শিক্ষকসকলক শিক্ষকতা এটা পৱিত্ৰ বৃত্তিৰূপে গ্ৰহণ কৰি কাম কৰিবলৈ আহ্বান জনায় ৷
প্ৰাথমিক শিক্ষকসকলৰ হাততেই ছাত্ৰ-ছাত্ৰীৰ ভৱিষ্যত নিৰ্ভৰ কৰে ৷ সেয়ে সকলোকে নিষ্ঠা সহকাৰে কাম কৰিবলৈ আহ্বান জনায় সাংসদগৰাকীয়ে ৷ মুখ্য অতিথিৰ ভাষণত তুলিৰাম ৰংহাঙে নিযুক্তি প্ৰাপ্ত ১৩৩ গৰাকী শিক্ষকক অভিনন্দন জনায় ৷ তেওঁ কয় যে ৰাজ্য চৰকাৰৰ সৈতে আলোচনা মৰ্মে আৰু পৰ্যায় ক্ৰমে সকলোকে স্থায়ী শিক্ষক ৰূপে নিযুক্তি প্ৰদান কৰা হ’ব৷
শিক্ষকসকলৰ দৰমহা সমস্যা সমাধান হোৱাৰ লগতে শিক্ষকসকলৰ সকলো অভাৱ -অভিযোগ শুনা হব বুলি কয় ৷ শিক্ষাই জীৱন গঢ়াৰ সম্পদ বুলি উল্লেখ কৰি মুখ্য কাৰ্যবাহী সদস্য তুলিৰাম ৰংহাঙে কয় যে, নিযুক্তি প্ৰাপ্ত শিক্ষকসকল নিযুক্তি পোৱা স্থানত একাগ্ৰতাৰে শিক্ষা দান কৰক ৷ শিক্ষাৰ ক্ষেত্ৰত বাণিজ্য আৰু বিজ্ঞান শাখাৰ পৰীক্ষাত জিলাখনৰ ছাত্ৰ-ছাত্ৰীসকলে আশাপ্ৰদ ফলাফল লাভ কৰাৰ বিপৰীতে মেট্ৰিক পৰীক্ষাত অন্তিম স্থানত থকাৰ বাবে ক্ষোভ প্ৰকাশ কৰে তুলিৰাম ৰংহাঙে ৷
বিগত সময়ছোৱাত কাৰবি আংলঙৰ ৪১ গৰাকী ছাত্ৰ-ছাত্ৰীয়ে মেডিকেলত উত্তীৰ্ণ হোৱা বুলি উল্লেখ কৰাৰ লগতে ইউপিএছচি আৰু এপিএছচি পৰীক্ষাৰ বাবে বিনামূলীয়া কোচিঙৰো ব্যৱস্থা কৰা হৈছে বুলি কয় ৰংহাঙে ৷
