দীৰ্ঘদিনীয়া জল্পনা-কল্পনাৰ অন্তত অৱশেষত প্ৰকাশ পালে শ্বাহৰুখ খানৰ (Shah Rukh Khan) প্ৰথমখন ‘পেন ইণ্ডিয়ান’ (Pan Indian) অৰ্থাৎ অল ইণ্ডিয়া ছবি ‘জৱান’ৰ (Jawan) মুক্তিৰ তাৰিখ। ছবিখনৰ ঘোষণাৰ পিছৰে পৰা দৰ্শকৰ মাজত উত্তেজনাৰ সৃষ্টি হৈছিল। কিন্তু অনুৰাগীৰ উৎসাহ বৃদ্ধি পোৱাৰ পাছতো বাৰে বাৰে উজুটি খাইছে ‘জৱান’। ছবিখনৰ মুক্তিৰ তাৰিখক লৈ কেইবাবাৰো বিভ্ৰান্তিৰ সৃষ্টি হৈছে।
প্ৰথম অৱস্থাত শ্বাহৰুখৰ ছবিখন জুন মাহত ছবিগৃহত মুক্তি পোৱাৰ কথা আছিল। ইয়াৰ পিছত পোষ্ট প্ৰডাকচন আৰু ভিএফএক্সৰ কামৰ বাবে তাৰিখটো পিছুৱাই দিয়া হʼল, আৰু আগষ্ট মাহত মুক্তিৰ গুণাগঁথা চলিছিল। যোৱা মে’ মাহত ‘জৱান’ৰ মুক্তিৰ তাৰিখ ঘোষণা কৰি সকলো জল্পনা-কল্পনাৰ অন্ত পেলাইছিল। ৭ ছেপ্টেম্বৰত বলীউডৰ কিং ‘জৱান’ ৰূপে ডাঙৰ পৰ্দালৈ ঘূৰি আহিব। তাৰ পূৰ্বে ছবিখনৰ প্ৰচাৰৰ আভাস কেতিয়া দেখা পাব? বৰ্তমান তাৰকাগৰাকীৰ অনুৰাগীয়ে সেই প্ৰশ্নৰ উত্তৰ বিচাৰিছে।
‘জৱান’ৰ চেটৰ পৰা কেইবাখনো ছবি আৰু ভিডিঅ’ ভাইৰেল হৈছে। আনুষ্ঠানিকভাৱে মুকলি কৰা হৈছে ‘জৱান’ৰ মোচন পোষ্টাৰো। ইমান দিনে অনুৰাগীসকলে কেৱল ইয়াতেই সন্তুষ্ট হʼবলগীয়া হৈছে। কিন্তু আৰু নহয়। খবৰ, জুলাই মাহৰ আৰম্ভণিতে মুক্তি পাবলৈ গৈ আছে ছবিখনৰ প্ৰথম টিজাৰ। শুনা গৈছে যে শ্বাহৰুখ আৰু পৰিচালক এটলীয়ে ৭ জুলাইত মুকলি কৰিব ‘জৱান’ৰ প্ৰচাৰমূলক টিজাৰ।
তথ্য অনুসৰি, ফিল্মমেকাৰসকলে বিশেষ অতিথিৰ উপস্থিতিত চেন্নাইত ‘জৱান’ৰ প্ৰচাৰমূলক স্নিক পিক লঞ্চৰ পৰিকল্পনা কৰিছে। তাৰ ওপৰত ভিত্তি কৰি এই তাৰিখটো অলপ পিছুৱাব পাৰে। কিন্তু অনুৰাগীয়ে আৰু বেছি সময় অপেক্ষা কৰিব নালাগে। ৭ জুলাইত নহ’লেও, ১৫ জুলাইত শ্বাহৰুখৰ প্ৰথমখন পেন ইণ্ডিয়ান চলচ্চিত্ৰ প্ৰচাৰৰ আভাস মুক্তি পাব।
