‘পাঠান’ৰ ছমাহৰ পাছত এইবাৰ আহি আছে ‘জোৱান’ (Jawan)। শ্বাহৰুখ খানৰ (Shah Rukh Khan) পুনৰ একচন আৰু মনোৰঞ্জনেৰে ভৰপূৰ এখন ছবি। ‘জোৱান’ৰ আনুষ্ঠানিক ঘোষণাৰ পিছৰে পৰা দৰ্শক আৰু অনুৰাগীয়ে ছবিখনৰ বাবে অপেক্ষা কৰি আছে। যোৱা ১০ জুলাইত ছবিখনৰ প্ৰিভিউ মুক্তি পোৱাৰ পিছত এই উত্তেজনা বাঢ়িছে।
অহা ৭ ছেপ্টেম্বৰত ছবিগৃহত মুক্তি পাবলৈ গৈ আছে ‘জোৱান’ (‘Jawan’ release on September 7)। মুক্তিৰ বাবে এমাহো বাকী নাই। গতিকে বাদশ্বাহৰ অনুৰাগীসকলে এতিয়া ছবিখনৰ মুক্তিৰ বাবে অপেক্ষা কৰি আছে। ইয়াৰ মাজতে ইউএইত ‘জোৱান’ৰ টিকটৰ আগতীয়া বুকিং আৰম্ভ হৈছে।
শেহতীয়াকৈ এজন নেটিজেন তথা শ্বাহৰুখ অনুৰাগীয়ে টুইটাৰত বিভিন্ন মাল্টিপ্লেক্স ৱেবছাইটৰ ছবি শ্বেয়াৰ কৰিছে। তাত দেখা গৈছে, ইউএইৰ কেইবাটাও মাল্টিপ্লেক্সত ‘জোৱান’ৰ টিকটৰ আগতীয়া বুকিং আৰম্ভ হৈছে। শ্বাহৰুখ খানক লৈ ডুবাইবাসী সদায় উৎসাহী হৈ আহিছে। ‘পাঠান’ৰ সময়তো তাৰ আভাস কেইবাবাৰো দেখা গৈছে।
ইতিমধ্যে বুজা গৈছে যে ‘জোৱান’ৰ ক্ষেত্ৰত ই বেলেগ নহʼব। কিন্তু ২১ দিন পূৰ্বে এডভান্স বুকিং আৰম্ভ হোৱাৰ বাবে নেটিজেন কিছু আচৰিত হৈছে। তেওঁলোকৰ প্ৰশ্ন, ভাৰতত কেতিয়াৰ পৰা এডভান্স বুকিং আৰম্ভ হʼব? অৱশ্যে সেই প্ৰশ্নৰ উত্তৰ এতিয়াও পোৱা নাই।
